KOMUNIKADO DI KUERPO POLISIAL KÒRSOU Dama ta fayesé a konsekuensia di mordé di kachó

KOMUNIKADO DI KUERPO POLISIAL KÒRSOU
180 / 2017
3 yüni 2017
Dama ta fayesé a konsekuensia di mordé di kachó
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ

Djabièrnè 2 yüni 2017 alrededor di 20.15 ’or sentral di polis a risibí notifikashon ku na un kas na Kenepa un señora ansiano a keda ataká pa algun kachó i ku e ta gravemente heridá. Polis a bai ku urgensia na e sitio i a topa un dama ku heridanan rònt su kurpa. For di un investigashon preliminar ku polis a realisá na e sitio a resultá ku e abitante(nan) di kas a yega kas i a haña nan kuater(4) kachónan ta morde e dama aki ku ta nan famia. Mesora nan a aktivá i a trata di stòp e kachónan. E dama víktima aki, Renilia Beker-Sluis, nasé na Kòrsou 7 yüni 1924 a risibí heridanan hopi serio i a keda transportá pa Poliklínika di SEHOS pa tratamentu médiko. E víktima a keda interná den Hospital den kondishon di hopi preokupashon. Djasabra dia 3 yüni 2017 polis a haña notifikashon ku alrededor di 01.16 e víktima a fayesé a konsekuensia di e heridanan ku e la risibí. Riba òrdu di Fiskal di Ministerio Públiko polis a konfiská e kachónan i laga e instansia konserní pasa nan pa otro mundu.