Servisio Públiko i Kuerpo Polisial Kòrsou ta konsientisá públiko pa ta kouteloso ku ID, asta riba medionan sosial.

Servisio Públiko i Kuerpo Polisial Kòrsou ta konsientisá públiko pa ta kouteloso ku ID, asta riba medionan sosial.

Willemstad – For di aña 2016 ta pasa spòt na algun radio i televishon di e Ministerio di Maneho di Gobernashon, Planifikashon i Servisio Públiko ku tin e ophetivo pa konsientisá públiko pa ta kouteloso ku pasport, sédula i/òf reibeweis. Kuerpo di Polis Kòrsou (KPC) tambe a uni su mes den e mensahe: “Sea kouteloso ku bo dokumento. Bo ID, bo responsabilidat”.

Tur luna te ainda Servisio Públiko ta haña bastante notifikashon ku e dokumentonan importante aki ta pèrdí. Hopi biaha ta trata di hendenan ku no sa unda nan a laga e dokumento. Tin biaha a laga nan na un establesimentu kaminda a traha kopia pa un tramite. P’esei e kampaña pa konsientisá públiko pa ta mas koutelosa ku nan dokumento.

Pa e motibu aki KPC ta infatisá e importansia di ta kouteloso ku dokumentonan. Un konsekuensia serio di pèrdida di dokumento di identifikashon ta froude di identidat (identiteitsfraude). Últimamente nos a tuma nota ku dokumentonan perdí ta keda poné riba medionan sosial pa esun ku konosé e doño por avis’é pa e sa unda e por rekobrá e dokumento. Mester remarká ku aunke e gesto aki ta di bon kurason i sin mal intenshon e por krea e oportunidat pa otro kometé acto froudulento ku dokumento ageno. Malechornan por kue informashon ku tin riba e dokumento i hasi uso di dje tantu aki komo den eksterior i di e manera aki hinka e doño di e dokumento den problema finansiero òf hustisial. Tin diferente kaso komo ehèmpel ku nos konosé kaba. Konsultá e site aki. https://www.google.nl/amp/s/www.nrc.nl/nieuws/2016/09/28/ik-ben-niet-de-man-die-jullie-zoeken-4504936-a1523787/amp

Servisio Públiko ke rekordá tur persona ku pèrdè nan dokumento di identidat no tin mester di bai polis pa mèldu e pèrdida, pero por bai na Kranshi òf Departamentu di Reibeweis mes pa hasi esaki einan. Akinan klientenan ta yena un formulario di pèrdida. I den kaso ku tur kos resultá di ta na òrdu e persona por pidi su dokumento nobo. Tambe nos kier a pidi esnan ku haña dokumentonan pèrdí, pa no publiká e fotonan riba ret sosial pero hiba e dokumento aki Kranshi òf Ofisina di Reibeweis. Alabes enkurashá i pone enfasis pa niun persona hasi nan dokumentonan públiko manera esnan den e kaso ariba menshoná pa despues no haña nan mes den un problema serio ku tal bes por a evitá.

Pa informashon adishonal tokante e dokumentonan por yama Bentana di Informashon na 0800-1515 òf konsultá http://www.gobiernu.cw.