PARLAMENTO TA BAI KUMINSA DUNA RELATO DI SU BISHITANAN DI TRABOU NA PUBLIKO DEN BIBLIOTEKA NASHONAL KORSOU

PARLAMENTO TA BAI KUMINSA DUNA RELATO DI SU BISHITANAN DI TRABOU NA PUBLIKO DEN BIBLIOTEKA NASHONAL KORSOU

Willemstad -Djárason dia 17 di ougùstùs 2016, Grefir di Parlamento, sr. mr. Silvin Cijntje, i direktor di Biblioteka Nashonal Kòrsou Frank Martinus Arion (BNK), sra. Gerda Willems, a firma un akuerdo di intenshon pa yega na un infrastruktura pa por fasilitá presensia di un Büro Nashonal di Informashon tokanto nos Parlamento den BNK. Meta mútuo di kolaborashon entre Parlamento i BNK riba tèrmino largu ta pa krea un plataforma sentral den BNK, kaminda informashon di Parlamento ta asesibel pa pueblo di Kòrsou en general, i enrikesé e konosementu dje públiko ku ta bishitá BNK su saber tokante funshonamentu di Parlamento, e órgano di estado mas haltu di Kòrsou.
E siman akí Parlamento huntu ku Biblioteka Nashonal Kòrsou Frank Martinus Arion a kuminsá ku e preparashonnan nesesario pa organisá e promé dos seshonnan informativo relashoná ku e bishita di trabou ku algun miembro di Parlamento den e dianan akí ta bai realisá na Panamá den kuadro di e aktividatnan di e Parlamento Latino Amérika i Karibe (PARLATINO). Otro siman lo tuma lugá e konferensia anual di Parlamentonan di Reino Hulandes (IPKO) na Den Haag Hulanda. E intenshon ta pa manera e delegashon di Parlamento yega bek Kòrsou, Parlamento ta organisá e enkuentronan informativo den BNK pa asina públiko en general, interesadonan i ekspertonan invitá, por bini huntu i den un ambiente ameno pone nan mes na altura di e loke ku e delegashon Parlamentario a deliberá, eksperensia i a logra na interes Nashonal di nos pais den hemisferio Latino Amerikano i Karibe i den Reino.
Djaluna dia 5 di yüni 2017 último vise Presidente di Parlamento sra. Gisélle Mc William a realisá un bishita di trabou na Biblioteka Nashonal Kòrsou Frank Martinus Arion pa pone su mes na altura dje trabounan di preparashon ku ya a tuma lugá i laga e gerensia di BNK informe dje avanse dje proyekto te na e momentunan akí. Direktor di BNK sra. Gerda Willems a informá vise Presidente di Staten dje fase i trabounan ku ya e proyekto a pasa aden, miéntras a deliberá riba e echo ku awó ta bai kuminsá duna inisio na e parti di organisá charla, simposio, seshon informativo, tayer i debatenan ku tin relashon ku e meta, trabou i aktividatnan di Parlamento.
Riba e potrèt(nan) por mira momentu ku e direktor di Biblioteka Nashonal Kòrsou Frank Martinus Arion sra. Gerda Willems ta informando vise Presidente di Parlamento sra. Gisélle Mc William enkuanto e informashon i eksposishon permanente i tur e posibilidatnan ku tin pa organisá diferente tipo di evento den nos Biblioteka Nashonal.