Un relato di Parlamentario Elsa Rozendal tokante su biahe pa Parlatino yüni 2017
I. Introdukshon Durante 3 dia, miembronan di Parlamento di Kòrsou i di otro paisnan di Karibe i Latino Amérika ta partisipá na Parlatino. E biahe di trabou pa Parlatino ta konsistí di 3 dia di interkambio i palabrashonnan ku ta keda hasí den e Komishonnan Fiho di Parlatino i Asamblea General.
Parlatino ta keda oganisá na Panamá pero por sosodé insidentalmente ku un òf mas komishon ta reuní na otro paisnan den Karibe òf Latino Amérika.
E biaha aki a toka Panamá kaminda e Sede prinsipal di Parlatino ta situá. Tambe ya komo ku na mes momento a tene e di XXXIII Asamblea General. Un Asamblea General ta keda organisá 2 biaha pa aña. Durante e Asamblea General tin entre otro e seremonia di hisamentu di bandera di e diferente paisnan partisipante, tin panelnan ku ta duna nan punto di bista riba un tema komun i riba e di dos dia ta vota riba proposishonan ku ta keda trahá den e komishonnan fiho di Parlatino.
E komishonnan fiho di Parlatino ta komparabel ku Komishonnan Fiho di Parlamento di Kòrsou. Den e komishon di Parlatino bo ta prepará proposishonnan pa bai Asamblea General pa medio di e Junta Directiva.
E Junta Direktiva ta reuní 3 biaha pa aña. E Junta Directiva tin ku aprobá tur e desishonnan ku ta keda proponé den e komishonnan di trabou i hiba nan na votashon den e Asamblea General.
Den un Komishon Fiho di Parlatino ta traha tambe riba “Leynan Marco”.
Esakinan ta leinan ku ta keda trahá konhuntamente ku otro paisnan di Karibe i Latino Amérika. Un Ley Marco por keda adaptá i apliká na Kòrsou tambe.
II. Trabou den Komishon Fiho
Mi promé dia di Trabou a kuminsá ku un reunion den “Comision de Asuntos Laborales”. E forma di traha den e komishon ta basá riba e “ABC de los comisiones”. Esaki ta un guia di orientashon pa identifká e pasonan ku e komishon tin ku tuma pa yega na studia, formulá i disidí riba un proposishon (di Ley Marco).
E tema e biaha aki tabata “Trabajos para Discapacitados”.
(Trabou pa personanan ku un desabilidat). Den komishon nos a deliberá tokante importansia i posibilidatnan laboral pa personanan ku un desabilidat.
Konklushon ta ku basá riba e resolucion di Nashonnan Uní, e komishon di “Asuntos Laborales” ta bai studia e posibildat pa traha un Ley Marco pa insentivá kompanianan pa tuma hende ku desabilidat den servisio i kaminda tin diskriminashon pa duna sankshon.
Pero e proseso pa yega na un Ley Marco por ta largu. P’esei e komishon a bini ku un proposishon pa medio di un “Documento de Recomendación” bai Asamblea General pa aprobashon.
III. Asamblea General
E dos último dianan tabata mi partisipashon na e Asamblea General.
E promé dia parti mainta a kuminsá ku e seremonia di hisamentu di bandera di e paisnan miembro. Despues a hisa bandera di Panama i Parlatino. Seguidamente a sigui pa e sala prinsipal pa kantamentu di Himno di Panama i Parlatino. Aki e aktividat a kuminsá ku un spich di e Presidenta del Parlatino, Panama, señora Blanca Alcalá (México). E mainta a sigui ku diferente otro spich di invitadonan di e panel di introdukshon. E aña aki e panel tabata konsistí di e.o: Clarissa Azkoul, Jefe Adjunta de Personal de la Organizacion Internacional para las Migraciones ( OIM), Juan José Gómez Camacho, Co-facilitador del Pacto Mundial i señor Kailash Satyarthi, ganadó di Premio Nobel 2014 (India).
Tur a tira un spich sumamente interesante.
Parti merdia tabata tin 6 panel mas.
E biaha aki e tema di e di #XXXIIIAsambleaGeneral tabata “La Migración en América Latina y el Caribe: Realidades y Compromisos Rumbo al Pacto Mundial”.
Sifranan di CEPAL ta mustra ku tin mas o menos 28 miyon persona ku ta sali nan pais i drenta otro pais na un manera illegal. Meta di e enkuentro di e Asamblea General tabata pa analisá i proponé akshonnan pa mediante lei yega na un maneho di migrashon na òrdu, responsabel i segun regla manera a keda palabrá den e “Declaración de Nueva York” ratifiká pa Hefenan di Estado i Gobièrnunan
rumbo pa e Pacto Mundial 2018. E diferente panelnan a toka diferente aspekto di Migración. Entre otro:
“Los derechos humanos de los migrantes”
“El tráfico ilícito de migrantes, la trata de mujeres, niños y jóvenes”
“Migraciones causadas por los efectos del cambio climático o contextos de crisis”.
Kada miembro di e panel a trese e realidat di su pais dilanti basá riba e tema di Migración. Ta boga pa huntu tur e paisnan den Latino Amerika i Karibe yega na maneho pa garantisá un trato digno pa personanan migrante i brinda e hendenan aki tur fasilidat manera edukashon, akseso na kuido médiko, trabou i bibienda.
Riba e di dos i último dia di e Asamblea General tabata tin entre otro eskoho di un “Mesa Direktiva” nobo i aprobashon di diferente Resolushon ( moshon) i Leynan Marco (Ley Modelo). En total, 23 pais ta miembro i a partisipá na e Asamblea General.
Promé ku votashon a regsitrá 20 pais ku tabata presente i huntu 131 parlamentario a representá nan paisnan pa votashon. E resolushonnan i leinan ku a bai na votashon tabata: ✔Proyecto Ley Modelo de Complentación Energética Sostenible ✔Proyecto Ley Modelo residuos Desechos Sólidos ✔Proyecto Ley Modelo de Protección de Bosques ✔Proyecto Ley Modelo de Etiquetado de Productos Alimenticios Procesados y Ultra procesados para el Consumo Humano y Protección a la Salud ✔Resolución Declarando apoyo y promoción de la Energia como Herramienta de Desarollo Regional y Mundial ✔Resolución sobre Migración:”Realidades y compromisos rumbo a la adopción del pacto mundial para una migraciò segura, ordenada y regular
Tur e Resolución nan i Leynan Marco a keda aprobá!
IV. Konklushon
Mi por bisa ku sigur e biahe pa Parlatino tin un balor agregá pa e Parlamentario i pa su pais en general. Aparte di e diferente aktividatnan i trabounan den komishon, e 3 dianan aki tabata hopi importante tambe pa hasi “networking”. Bo ta sera konosí mihó ku koleganan di otro paisnan i interkambiá tokante e trabounan di parlamento. Esaki ta fasilitá despues e kontakto den eksterior tambe. Mi por a ripará ku nos tur tin hopi kos en komun i e mesun retonan. Bo ta realisá ku hopi biaha mesun akshonnan mester keda tumá pa garantisá un mihó bienestar pa un komunidat i ku huntu nos por logra mas. Di e interkambionan aki bo ta haña inspirashon i ideanan ku por keda eventualmente apliká/ introdusí na Kòrsou tambe.
“Ora hopi mente bini huntu, bo por haña ideanan genioso”.
Por sierto, tur hende por a sigui e Asamblea General riba http://www.parlatinotvonline.tv