Kòrsou na kaminda pa stipulá un posishon i direkshon pa sektor ekonómiko di “e-commerce”

Kòrsou na kaminda pa stipulá un posishon i direkshon pa sektor ekonómiko di “e-commerce”

Willemstad – Ministerio di Desaroyo Ekonómiko (MEO) ta trahando
deligentemente pa yega na un plan di akshon pa loke ta trata ekonomia
digital. Den kuadro di esaki, e ministerio a organisá, bou di guia di e tim
lokal di “United Nations Development Program” (UNDP), un diálogo
demokrátiko pa kompilá pasonan importante ku lo por aportá na kristalisá
MEO su vishon pa ku komérsio elektróniko (“e-commerce”).
E promé diálogo a tuma lugá djamars 13 di yüni i a konta ku un kantidat di
partisipante ku MEO ta sumamente satisfecho kuné. Un diálogo demokrátiko
ta forma un plataforma ideal pa optené punto di bista balioso di komunidat,
den e kaso aki e aktornan prinsipal den e sektor ekonómiko di “e-commerce”.
“E diálogo tabata un eksigensia pa por yega na un plan di akshon”, asina
señor Emauro Scoop, representando MEO, a splika durante introdukshon di e
tema.
Resultadonan di e diálogo lo kondusí na preparashon di un konseho final pa
Minister di Ekonomia. Señor Scoop a indiká mas aleu ku ta spera di por tin e
konseho final aki kla pa presentá riba término hopi kòrtiku.
Dia 20 di yüni lo tin un di dos seshon di e diálogo demokrátiko aki. Despues
di e di dos seshon, MEO lo kompartí e resultadonan preliminar ku a kompilá
for di ámbos seshon ku públiko en general.
Inskripshon pa e seshon aki ya a sera, debí na e interes enorme di públiko.
Ministerio di Desaroyo Ekonómiko, pa medio di señora Zulaika Mook,
direktor di e sektor di Desaroyo Ekonómiko i Inovashon, a finalisá e atardi
gradisiendo tur ku a partisipá i enfatisando ku trabou konhunto ta duna
resultado satisfaktorio.