Website nobo di Stichting Splika bautisa na Cas di Aruba

Website nobo di Stichting Splika bautisa na Cas di Aruba

Den Haag –Minister Plenipotenciario di Aruba Juan David Yrausquin, directora interino di Cas di Curaçao Monica Hazel y presidente di Splika Ruben Severina a haci e akto di bautismo di e website nobo di Stichting Splika na Arubahuis.

Na e ocacion aki Minister Yrausquin a felicita Splika cu nan website nobo. E mandatario a bisa di a tira un prome bista caba riba e website y e mester constata di a keda impresiona. Sr. Yrausquin tabata tin alabez palabra di elogio pa e directiva di Splika pa nan dedicacion pa cu Papiamento aki na Hulanda. ‘Un idioma bunita cu ta e idioma materna na tres isla chikito den Caribe. Pesey nos mester conserve como parti di nos cultura,’ asina e mandatario a bisa.

Miembronan di e directiva di Splika Ernesto Rozendal y Tirsha Isenia a hacu uso di oportunidad aki pa a duna un splicacion riba Splika y e acitividadnan cu lo bai wordo teni e aña aki. Na final di e programa e invitadonan a gosa di musica di Tipico Den Haag.

Stichting Splika a keda lanta na 1990 y ta para pa Stimula Papiamentu, Literatura y Informacion riba Kultura di Antianan abou. Un di e metanan principal di Splika ta pa crea e posibilidad pa interesadonan drenta of mantene contacto cu cultura Antiano\Arubiano, particularmente e Papiamento. Banda di esaki Splika ta contribui na e proceso pa reconimento oficial di Papiamento y ta sostene e uso di Papiamento como idioma den enseñansa.

Pa logra su metanan Splika ta haci investigacion riba tur e facetanan di cultura Antiano\Arubiano, specialmente dirigi riba e idioma di Papiamento. Nan ta organisa cursunan di Papiamento y tambe charlanan, simposianan y manifestacionnan cultural. Alabes Splika ta produci material pa duna les y nan ta duna trainingnan na docentenan di Papiamento. En general Splika ta stimula e identidad Antiano\Arubiano y e relacion entrea e comunidad Antiano\Arubiano cu otro comunidadnan na Hulanda.

This site uses Akismet to reduce spam. Learn how your comment data is processed.

error: Content is protected !!
%d bloggers like this: