Último fase i konsekwenshanan di e disturbio di wer Bret 

Último fase i konsekwenshanan di e disturbio di wer Bret 

WILLEMSTAD – Dia 17 di yüni último Servisio Meteorólogiko a manda un komunikado tokante di e sistema di wer ku tabata riba Oséano Atlántiko i biniendo nos direkshon. Durante merdia riba 19 di yüni e sistema a desaroyá den un tormenta tropikal i a haña e nòmber Bret. Konsiderando posibel impakto ku e sistema lo por a tin pa Kòrsou, riba 19 di yüni e organisashon pa kombatí kalamidat (RBo) a ser aktivá pa ta informá tokante di e sistema di wer i pa inventarisá e preparashonnan di tur servisio i organisashon, si a kaso mester alarmá RBo. 
RBo ta konsistí di diferente servisio i organisashon di (semi)gobièrnu manera Aqualectra, BTP, UOOW, Brantwer, Polis, Salú Públiko, SOAW, Direktorado di Komunikashon i Informashon i Direktorado ‘Wetgeving & Juridische Zaken’.  A kluster e servisionan aki den 9 diferente Funshonnan di Emergensia, e asina yamá ESF-nan. Tur ESF ta konsistí di otro servisionan i organisashonnan manera Krus Kòra, Defensa, VKC, Citro, ‘ABC busbedrijf’ i muchu mas. Tambe tin diferente organisashon ku ta forma un link importante den Rbo pa loke ta trata  duna informashon, manera Servisio Meteorológiko.  
Dia 20 yüni pa 7’or di anochi Minister Suplente di Asuntunan General a de-aktiva e RBo ku den e kaso aki ta nifiká, ku e la anulá e fase di alerta den kual e RBo tabata na e momento ei. Tumando na kuenta ku por a spera bientunan moderá te basta fuerte,  Minister a instruí e RBo pa keda den alerta pa, si akaso kondishonnan di wer kambia, pa aktivá mes ora.
Apesar ku e menasa di Bret a ser eliminá 20 yüni parti atardi, Kòrsou tabata tin bastante molèster di bientu duru i den ménos grado, awa seru. Brantwer, polis i servisio di storing di Aqualectra mester a duna asistensia na vários okashon. E insidentenan mas rapòrtá i pa kualnan mester a duna asistensiatabata palunan i waya di koriente ku a kai. Tambe a meldu (parsialmente)daknan ku a bula bai. Pa motibu ku Brantwer i UOOW a hasi palabrashon ku otroadelantá, a pèrkurá pa brantwer tin entre otro tapol pa tapa dak kaminda esey tabatanesesario.

Tabata konta di: 20 yüni 18.00 te 21 yüni 09.00

Aqualectra a duna e siguiente update:

A registrá 132 storing di elektrisidat di kual 2 tabata tin konsekuensia pa un aria grandi. E 2 storingnan aki a keda solushoná den kurso di anochi. A solushoná 97 di e 132 storingnan den kurso di mainta. E otro storingnan tabata mas chikí ku tambe a wòrdu atendé. 4 Biaha mas tantu empleado tabata disponibel i call operators èkstra pa yuda. 
Kuerpo Polisial Kòrsou a duna a siguiente update:

45 Notifikashon tabatin mester di atenshon di kual 8 tabata (parsialmente)daknan ku a bula bai. A mèldu ku 3 palu di mata a kai. Tambe Polis a risibí notifikashon di waya di koriente a kibra ku tabata tin koriente riba nan. 
Brantwer a duna e siguiente update:

A sali pa duna asistensia 39 biaha pa palunan ku a kai i plachi di dak ku a bula bai. Na 2 lokalidat daknan a bula bai kompleto. Na 1 di e sitionan aki ahinda brantwer tabata dunando asistensia awe mainta.  Di e total di petishonnan pa duna asistensia, 17 notifikashon tabata pa palu ku a kai. Den esei brantwer a aktua 8 biaha. Mayoria notifikashon a bini for di e aria di Banda Abou.
Kondishon di Wer

Komo konsekwensha di e sobra di Tormenta Tropikal Bret ku tabata pasa den nos aria por a midi ayera nochi bientunan fuerte riba Kòrsou (entre 45 i 60 km/ora), ku ráfaganan te mas of menos 90 km/ora na Seru Kokori.

Gobièrnu ta avisá pa sigui Meteo pa keda informá tokante kondishonnan di wer manera e App di Meteo i nan Facebook.
Pa sa kiko  gobièrnu ta hasi i kiko bo mes por hasi ora tin krísis òf un desaster, gobiernu ta pidi pa bai na e website http://www.kalamidat.cw òf download e App KALAMIDAT. Tambe por hasi uso di informashon den  buki di telefòn i kompartí informashon ku otro.

Na diferente Sentro di Bario a parti foyeto di informashon.  Por haña mas informashon serka UNSEBAKO.