SPICH DI MINISTER KOEIMAN NA OKASHON DI SELEBRASHON 3 AÑA UNSEBAKO 21 YUNI 2017

SPICH DI MINISTER KOEIMAN NA OKASHON DI SELEBRASHON 3 AÑA UNSEBAKO 21 YUNI 2017
===================================================

Direktiva di UNSEBAKO i sentronan di bario, invitadonan, damas i kabayeros, bonochi.
Pa mi ta un gran honor pa por dirihí algun palabra na bosnan na okashon di selebrashon di 3 aña di eksistensha di UNSEBAKO. Mi ta hopi kontentu ku 3 aña pasá un gran mayor”ia di sentronan di bario a haña otro den un union di sentronan di bario.
Mi ta felisitá UNSEBAKO di kurason pa e echo aki i ta gradisí UNSEBAKO pa tur e trabounan desplegá tur e 3 añanan aki den representashon di sentronan di bario .
Pa ami komo Minister di Desaroyo Sosial, Bienestar i Labor pero tambe pa nos komo gobièrnu ku a kaba di sinta, no tin ningun duda ku desaroyo di bario ta hopi importante pa desaroyo di nos komunidat.
Pasobra:
Ta den bario nos ta lanta, keda eduká i desaroyá siertu balor i normanan básiko komo suidadano.

Bario huntu ku núkleo di famía i skol ta institushonnan importante di edukashon: nan ta kargadó di balor i normanan di komunidat.
Bario pues ta e area di bienestar pa su habitantenan i ta atrabes di bario ta yuda fortifiká e sentido di kombibensha , komo parti di komunidat di Kòrsou.
E importansia aki di bario a keda formulá asina aki den nos Akuerdo di Gobernashon: “Bario ta bira e instrumento prinsipal pa desaroyo di komunidat i komo tal lo sòru pa e kondishonnan pa realisá un maneho di desaroyo integral i duradero pa bario”.
Ku esaki pues nos ta komprometé nos mes pa duna un empuhe fuerte pa awor sí nos komunidat avansá, tantu riba tereno sosial, ekonómiko, komo kultural. Pa e hende sinti su mes inkluí enbes di ekskluí for di e benefisionan ku su komunidat ta brinda.
I ora nos papia di e kondishonnan nos ke men tambe sòru pa e organisashonnan ku ta traha pa desaroyo di e hendenan den bario ta di tal forma ekipá ku nan por kumpli debidamente ku
nan trabou.
Komo tal ta obligashon di gobièrnu pa desaroyá un maneho integral pa desaroyo di bario, den koperashon estrecho I involvimentu di tur organisashon i sentronan di bario.

Kiko esaki ta nifiká konkretamente?
Ami lo bini ku un maneho pa desaroyo integral di bario kaminda gobiérnu tin un ròl di fasilitadó, entre otro pa finansas i sosten profeshonal. Pa barionan por disponé di e fondonan i personal nesesario pa e trabounan por tuma lugá.
Konsiderando e funshonnan importante ku sentronan di bario tin pa desaroyo di barionan lo mi krea kondishonnan pa sentronan di bario por funshoná mihó den kuadro di interkambio di informashon, formashon sosial-kultural i deportivo i tambe distraishon sano.
Aparte di esaki lo mi pone prioridat riba:
Drechamentu di tur zona ku ta konsistí di barionan ku a surgi sin planifikashon adekua i ku pa e motibu ey no ta disponé di fasilidatnan mínimo ku ta nesesario pa un bon funshonamentu di bario.
Drechamentu di infrastruktura di barionan, tambe den kuadro di drecha kalidat di bida di nos pueblo.
Desaroyo di un plan di urgensia pa atendé ku situashon di deterioro sosial di barionan.
Atendementu ku kriminalidat den bario ku emfasis riba programanan di prevenshon.

Promové empleo , e.p. pa hubentut den barionan.
Nos lo krea fasilidatnan pa voluntarionan por hasi nan trabounan di bario, entre otro kreando un fondo pa yega na un forma di kompensashon mínimo pa gastunan inevitabel ku boluntarionan mester hasi pa kumpli ku nan tareanan.
Tambe nos mester stimulá serka habitantenan di bario e sentido di responsabilidat sosial: den e kuadro aki inbolbí habitantenan i organisashonnan di bario den e proseso di toma di desishon pa asuntunan ku ta toka nan.
Damas i kabayeros,
Mi ta konvensí ku trahando komo Minister riba tur e puntonan menshoná aki riba nos por duna un aporte fuerte na kontenido di nos akuerdo di gobernashon ku ta enfoká riba enseñansa, formashon i kombatimentu di pobresa.
Nos no por sigui tolerá mas deterioro sosial di nos pueblo, en partikular den barionan, mas famíanan ku ta desfunshoná, demasiado hende ku entrada i nivel di edukashon abou, desempleo grandi bou di hoben, mas oumentu di kriminalidat bou di hoben, demasiado mama hoben soltera den nos barionan.
Pa nos trabou riba e tereno aki tin eksito ta imperativo pa den nos maneho pa desaroyo di bario pone hopi enfasís riba

empoderamentu di e organisashonnan ku dia aden dia afo ta hasiendo e trabou, tin biaha bou di kondishonnan hopi difisil.
Den e kuadro aki lo mi bini riba termino korto den koperashon ku UNSEBAKO i demas organisashonnan di bario, ku diferente proposishon pa fasilitá e trabou di tur organisashon di bario pa asina nos logra algun “quick wins”ku hopi bario pa basta dia ta anhelando p’e.
Damas i kabayeros,
Pa finalisá mi ke bolbe ripití mi kompromiso pa bini ku un maneho pa desaroyo di bario ku involvimentu di tur organisashon di bario, en partikular sentronan di bario I nan representashon UNSEBAKO ku awe a kukmpli 3 aña di eksistensia.
Nos no por desaroyá Kòrsou sin desaroyá barionan. “It takes a village to raise a child”
DANKI PA BOSO ATENSHON.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: