Diskurso di Presidente di UNSEBAKO mr Juny J. Sluis na okashon di selebrashon di e di 3 aniversario di UNSEBAKO dia 21 di yüni 2017

Diskurso di Presidente di UNSEBAKO mr Juny J. Sluis na okashon di selebrashon di e di 3 aniversario di UNSEBAKO dia 21 di yüni 2017

Minister di Desaroyo Sosial, Labor i Bienestar, Honorable Sr. Hensley Koeiman, Direktiva, Konseho di Federeshon i Tim di Sosten di UNSEBAKO, Presidente i direktiva di sentronan di bario afiliá na UNSEBAKO, Invitadonan spesial, Representantenan di medionan di komunikashon sosial, damas i kabayero, di mi parti tambe bon tardi i Bon Biní na nos selebrashon di e di 3 aniversario di UNSEBAKO, e Union di Sentronan di Bario di Kòrsou.
Distinguido presentenan, permití mi pa, prome ku drenta kontenido di mi diskurso, na hasi algun remarke inisial.
Na promé lugá mi ke ekspresá gratitut pa e konfiansa ku nos konseho di federashon a demostrá den mi persona pa (hustamente awe) a re-eligí mi komo presidente di UNSEBAKO. Boso por ta sigur ku mi lo sigui hasi esfuerso pa huntu nos logra sentronan di bario bon organisá i ku ta funshoná bon tambe.
Igualmente mi ke hasi uso di e okashon aki pa na nòmber di UNSEBAKO gradisí mi otro koleganan di direktiva pa nan esfuerso i sosten durante e ultimo 3 aña komo dirigentenan fiel i firme den e kousa. Pesei Frank Mathilda, Truus Isidora, Jonathan Plantijn i David Brug tambe a keda re-eligí den mesun funshon ku nan a okupá ultimo 3 aña. Nan ta meresé un aplouso.
Por ultimo mi ke ekstendé un palabra di rekonosimetu i gratitut na direktivanan di tur e 18 sentronan di bario ku ultimo añanan a karga i sostené fundashon UNSEBAKO. Ta e determinashon i konsistensia ku huntu boso a demostrá durante ultimo 3 aña a perkurá pa e eksito di UNSEBAKO. Pabien na boso tur!
Resientemente un habitante a komentá ku e ta kontentu ku a lanta UNSEBAKO, ku ela konsiderá un organisashon nobo pa yuda sentronan di bario. Wèl, ami mas bien ta mira UNSEBAKO komo e aktual organisashon di kordinashon pa sentronan di bario di Kòrsou ku ta afiliá na dje. Mi ta mire komo e susesor di Stichting Buurtcentra Curaçao ku a keda fundá dia 26 di yüli 1961 i ku despues a bira

Fundashon Federashon Sentronan di Bario di Kòrsou (FESEBAKO). Pues UNSEBAKO tin referensia.
Si papia di sentro di bario, outomátikamente bo ta haña bo ta papia di bario. Por konsiderá tur e aktividatnan ku ta tuma lugá na un sentro di bario komo e ‘software’ ku ta manehá tur e ‘hardware-nan’ di e bario. E hardware-nan di bario ta tur loke un bario tin mester na fasilidat pa e por funshoná bon komo bario. Anto, esei ta masha importante komo ku entretantu nos tur sa ku “Ta den bario ta lanta e mucha”. Pues, pa e mucha lanta bon, e bario mester ta funshoná bon komo tal!
Investigashonnan sientífiko a proba tambe ku ‘bario’ riba su mes tin un nifikashon sosial i komo tal ta eksistí un relashon entre bibamentu den un bario pober i mobilidat sosial. Ta opvio ku desaroyo personal di hende por parte ta keda formá pa su ambiente i sirkumstansia sosial i tambe pa e kondishon di su lugá di biba. Pues ta opvio tambe ku e bario, e area, e ambiente den kua e hende ta biba tin influensia riba e posibilidatnan ku bida ta ofres’e.
E ròl di un sentro di bario den e totalidat aki ta masha esensial, ounke ku kondishon ta sí ku e sentro di bario ta funshoná bon. Pa un sentro di bario funshoná bon, no ta dependé di e sentro di bario so, sino tambe di otro aktornan. Kada un di e aktornan ei mester kumpli ku su parti, sino e kos no ta bai bon.
E aktornan mas importante pa loke ta bon funshonamentu di e sentro di bario ta: e sentro di bario mes, e habitante di bario, e organisashon di kordinashon (UNSEBAKO) i gobièrnu (Ministerio di SOAW). Mi ta spera sinembargo ku den futuro serkano gremio empresarial/komersial lo uni nan mes na e grupo di aktornan ariba menshoná. E aktornan aki no mester kana brua den otro su pia, sino nan mester duna espasio pa kada unu kumpli ku su parti.
Un diskushon ku regularmente sa surgi ta e siguiente: ta sentro di bario mester ta esun ku ta ofresé bario e servisio of e aktividatnan ku e ta desea? Of t’asina ku e bario mester por instruí e sentro di bario pa ofresé loke bario ta desea na servisio i/of aktividat?

Na mi opinion tur dos ta posibel teórikamente. Ta dependé ta kua forma legal bo ta usa pa organisá e sentro di bario. A traves di un asosiashon enberdat por duna habitantenan di bario influensia riba maneho di e sentro di bario. Sinembargo a keda demostrá na diferente paisnan bon konosí pa nos, ku e forma legal di asosiashon no a duna bon resultado den e trabou aki.
Aki na Kòrsou tambe e situashon no ta diferente. Den un buki ku FESEBAKO a publiká na okashon di selebrashon di su 40 aniverario na aña 2001, e ta bisa losiguiente: Na 1953 a lanta e Fundashon Desaroyo di Pueblo (Stichting Volksontwikkeling). E fundashon aki a habri asosiashon di bario na Montaña, na Barber, na Steenrijk i na Soto. E asosiashon di Montaña ta e uniko ku a floresé konforme su intenshon. Pues, e forma legal di asosiashon den 3 di e 4 kasonan menshoná no a duna resultado. Awendia tur sentro di bario ta legalmente organisá den un fundashon i nan ta funshoná.
Distinguido presentenan, manera ya a bini dilanti, kada 60 dia UNSEBAKO ta organisá un Interkambio di Konosementu i Eksperensia, durante kua direktivanan di sentronan di bario afiliá ta interkambiá tokante un tema spesífiko pa asina kompartí konosementu i eksperensia riba e tópiko en kuestion.
4 dia pasá UNSEBAKO a tene su di 12 “Interkambio di Konosementu i Eksperensia” ku partisipashon di praktikamente tur sentro afiliá. E tópiko ku a keda tratá durante 3 ora di reunion tabata: “Kondishonnan mínimo pa un sentro di bario funshoná bon”. E resultado pa loke ta puntonan di akshon ku a keda presentá ta impreshonante.
Pa e motibu ei tambe mi por deklará ku outoridat ku UNSEBAKO i sentronan di bario di Kòrsou ta kla pa huntu nos pasa pa e siguiente nivel. Den esaki tambe nos ta konta ku sosten di otro aktornan ku mi a menshoná anteriormente.
Danki pa boso atenshon.!