Music & Memory Curaçao ta presentá Alive Inside Laga muzik krea milager

Music & Memory Curaçao ta presentá Alive Inside

Laga muzik krea milager

Wikènt pasa Music & Memory Curaçao a organisá un presentashon di e pelíkula “Alive Inside” den kolaborashon ku Konseho pa Grandinan pa tur trahadónan di diferente kasnan di kuido. Di e forma aki Music & Memory Curaçao ke informá nan tokante di e kontenido di e proyekto i tokante di e efektonan positivo ku músika personalisá por tin serka klientenan ku Alzheimer of otro forma di Demensia.

Músika ta rondoná nos tur. E chèns pa skucha nos músika preferí ta algu ku hopi di nos por hasi diariamente i e ta sosodé kasi outomátikamente. Pero na momentu ku kos ta dependé di un otro persona pa nos kuido diario, hopi aktividat personal, manera skucha músika ta kai afó. Maske esaki ta e kaso, e posibilidat pa skucha nos músika personal ta keda hopi importante. Un investigashon na Merka, Canada i Hulanda ta demostrá ku esaki tin efektonan positivo riba nos komportashon, nos emoshon, kon nos ta eksperensia doló i tambe ku e ta un método pa fomentá kontakto. Músika ta un método poderoso ku ta hiba nos bek den pasado i ta rebibá rekuerdonan. E dokumental “Alive Inside” ta laga nos eksperensia e poder aki di músika i mira kon esaki ta yuda drecha e animo di personanan ku Demensia. Ademas e ta demostrá kon personanan ta traha konekshon ku nan mes i nan ambiente. Asina nan ta haña un parti di nan identidat bek.

E presentashon di e pelíkula “Alive Inside” a keda organisá ku sosten di Konseho pa Grandinan i ku e meta pa inspirá, kompartí konosementu i fomentá mas oportunidat pa krea lasonan fuerte den sektor di kuido. E dokumental ta splika e proseso i e metanan di Music & Memory Curaçao hopi konkreto. ‘Bou di guia di e grupo kordinadó, kual ta konsistí di Curaçao Cares, Music Therapy Center Curaçao i Kas Hugenholtz, e proyekto Music & Memory Curaçao ta e promé proyekto afiliá na Music & Memory Inc. den region di Caribe. Un akuerdo a ser firma entre ocho organisashonnan na Kòrsou ku ta bai kolaborá ku otro ku e meta pa wak posibilidatnan pa integrá músika digital personalisá na den kas nan di kuido na Kòrsou komo parti di kuido diario. E ocho organisashonnan trahando huntu ta Music Therapy Center Curaçao, Curaçao Cares, Kas Hugenholtz, Stichting Alzheimer Curaçao, Fundashon Birgen di Rosario, CliniClowns Curaçao, Klinika Capriles i Verpleeghuis Bestèda.

Music & Memory Curaçao ta tin e honor di presentá e pelíkula den kompania di Minister S. Camelia-Römer di e Ministerio di Salubridat, Medio Ambiente i Naturalesa i Minister H. Koeiman di e Ministerio di Desaroyo Sosial, Labor i Bienestar. Tur dos Minister a ekspresá nan mes positivo pa ku e proyekto i a ofresé nan sosten na e inisiativa den forma di un kolaborashon inter ministrial pa asina logra hopi mas pa e grupo aki den nos komunidat. Músika personalisá komo parti di kuido a ser prueba di ta un manera efektivo pa mehorá kalidat di bida di nos grandinan.

E proyekto Music & Memory Curaçao a ser inspirá pa Music & Memory INC na Merka i ta traha huntu ku MUSIC & MEMORY na Hulanda pa risibí konseho. Despues di e presentashon di pelíkula e tim di Music & Memory a risibí 7 laptop komo gesto di El Tributo pa e organisashonnan trahando huntu pa realisá e proyekto. Bo tambe por sostené e proyekto riba diferente manera: Donashon di iPods (nobo òf usá), ‘on-ear headphone’, karchi di iTunes, bira ambasador di e proyekto òf bira boluntario. Por tuma kontakto ku Curaçao Cares na musicandmemory@curacaocares.orog òf yama 7881952 pa mas informashon. Yuda Music & Memory Curaçao krea milager ku músika.
By Amarcelli Scoop

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: