BOOSHI WEVER SEMPER A PARA RESPONSABEL PA SU MANEHO COMO MINISTER

BOOSHI WEVER SEMPER A PARA RESPONSABEL PA SU MANEHO COMO MINISTER

Nos por a tuma nota di un declaracion di sra. Evelyne Wever-Croes den e conferencia di prensa di dialuna, 26 di juni ultimo, unda cu ela atende cu e asunto di Salud Publico y muy en especial esun di nos studiantenan cu a studia medicina den nos region. Nos ta comparti e disgusto expresa door di Sra. Wever riba e ponencianan denigrante haci door di Napoleon Schwengle na adres di e profesionalnan medico, pero nos no por comprende pakico sra. Wever-Croes a haya necesario pa hinca mi persona tambe durante conferencia di prensa. Sra. Wever-Croes a duna di conoce cu pa 8 aña largo e gobierno di AVP no a haci nada pa coregi e asunto di e studiantenan, “despues cu BOOSHI WEVER no a logra” pa regla e asunto aki.
Prome cu mi atende cu e forma di proceder di sra. Wever-Croes y su partido MEP, lagami duna en corto e maneho cu mi persona a entama y ta responsabel p’e durante mi mandato como minister. Lagami cuminsa pa bisa cu mi maneho semper tabata tin como unico meta pa pone e ser humano na prome lugar. Mi a introduci reglanan pa proteha esnan cu legalmente ta biba riba nos isla y brinda nan tur oportunidad pa por desaroya nan talentonan, sin miedo cu nan lo no por contribui na e progreso di nos pais, pasobra nan lugar a wordo ocupa pa personanan cu pa motibo di corrupcion administrativo a cumpra permiso pa ta aki.
Riba tereno di Salubridad mi a laga construi ImSan, usando informacion cu nos a haya despues cu dr.Posner a laga hasi un “gezondheidsonderzoek”, cual investigacion a mustra cu un di e problema medico mas grandi aki na Aruba ta riba e tereno cardiovascular a consecuencia di e asina yama obesitas. E proposito no solamente tabata pa duna un mihor servicio na e habitantenan Pariba di Brug, pero tambe pa atende complicacionnan ocaciona pa malesanan cronico (problema di curazon, diabetes y dialysis). Aparte di esaki e aspecto di prevencion mester a hunga un rol hopi grandi y importante den e facilidad medico aki.
Mi a laga construi un facilidad cu lo mester a atende y soluciona e problema di desperdicio na Aruba y di e forma ey tambe trese un alivio no solamente pa nos medio ambiente pero tambe evita mas daño pa e salud di esnan cu ta biba den e bario di Parkietenbos.

For di un principio mi a atende y a regla e asuntonan cu tin di haber cu registracion di esnan cu a sigui un estudio riba tereno medico di un forma pragmatico y creativo, pero semper den margen di ley. Mi a duna yuinan di tera cu a studia medicina un oportunidad pa por a traha na Aruba, tambe esnan cu a studia den region. Asina aki mi a firma TUR peticion cu a yega cerca mi pa un yui di tera pa traha sea na e.o. HOH, ImSan of SVB. Esaki tanto pa e “basisartsen” como e specialistanan, atrobe basta cu a cumpli cu loke ta poni den e ley “Uitoefening Geneeskunst” (AB 1996 GT 50).
Mester menciona cu e tempo ey a bin cu e opleiding specialisa pa “Bedrijfsarts” na unda a permiti pa esnan cu a studia den region por a participa den dicho “opleiding” y cu satisfacion mi por constata cu te ainda nan ta trahando como tal na SVB.
Aparte di esaki a crea e posibilidad pa esnan cu a studia “tandheelkunde” (Dentista) den regio por haci un examen cu ta duna nan e “bevoegdheid” pa por traha aki na Aruba. Prome cu esaki e examen aki por a ser haci na Corsou so. Alabes mester ser menciona cu, mirando e necesidad di mas dokternan di cas, e estudio pa “huisarts” a wordo introduci na 2010. Esaki den cooperacion cu VUmc. E intencion tabata pa duna esnan cu a studia medicina den region e oportunidad pa sigui e estudio aki tambe.
Den cuadro di esaki, mi persona hunto cu e director di Salubridad Publico di e tempo ey, a hiba combersacionnan cu esnan responsabel pa e asina yama “MIR”-examen na Spaña. Nos a logra di yega na acuerdo di principio cu e examen aki lo por a ser haci aki na Aruba bou supervision di esnan encarga cu esaki na Spaña. E prome examen di MIR lo por a tuma lugar aki na Aruba mes na januari 2010, sinembargo gobierno a cambia y tur cos a cay na awa. A haci esaki pa duna esnan cu pasa e examen aki cu exito por a drenta e estudio di “Huisarts” cu ya caba a cuminza na Aruba. Mester corda si cu no ta TUR esnan cu lo a pasa e examen aki cu exito lo por drenta e “opleiding” aki. Ta un cierto cantidad so por drenta cada aña. Den buskeda pa un solucion realístico pa esnan cu a studia den region a elabora tambe riba e posibilidad pa banda di e MIR, bin cu e oportunidad pa pasa e “Boards-exam” cu ta existi na Merca en bes di bai inventa e wiel di nobo. Nos ta di opinion cu mescos cu ta existi e posibilidad pa haci e “tandartsen-examen” na Aruba, lo por crea algo asina pa e basisartsen y specialistanan usando e examen di “Boards” di Merca.

Ta di lamenta cu ora ta combini e partido MEP, no ta Booshi Wever, pero ta MEP. Ora no ta combini, e ora ta Booshi Wever so. Esaki mi por a constata ora ta trata p.e. proyecto IMSAN, e ora si ta MEP y no Booshi Wever. Awor aki cu no por a keda cla na 2008/2009 cu un areglo ta Booshi Wever so y no MEP. Y ora tabata trata di dump, na comienso cu Benny Sevinger tabata zwaai cu e toalla femenina den Parlamento y tabata critica e proyecto di dump y yama mi pa tur cos, tambe tabata proyecto di Booshi Wever. Despues cu Bouldin & Lawson a gana su ultimo caso y cu huez a bisa cu deliberadamente gobierno di Aruba despues di 2010 a percura pa boycotea e proyecto di dump, e ora ey atrobe e proyecto ta di MEP. Mescos cu ora ta papia di e maneho estricto cumi a hiba ponieniendo nos yuinan di tera na prome lugar, cu a percura pa caba cu tur corupcion den e asunto di otorgamento di permiso conforme di LTU, y esnan cu tabata goza di e “free for all” cu tabata existi, ta bisa cu e maneho entre 2005 y 2009 tabata contra stranhero, ta wordo bisa cu esey ta Booshi Wever,no MEP!!!
Sra. Wever-Croes, cu tur su razón, a keha contra e forma cu su famia of esun di su colega di partido ta wordo involucra den discusionnan na unda nan no (por) ta presente. Pakico anto sra. Wever-Croes si a haya ta necesario pa hasi esaki cu mi persona. UPP y mi persona lo keda firme den nos afan pa pone e ser humano na prome lugar y proteha nos yiunan di tera door di hiba un maneho husto y transparente. Nos no ta tira piedra sconde man, ni nos kier hunga populista, pero nos lo keda semper responsabel pa nos actonan, pensamento y maneho.

Booshi Wever
Lider UPP

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: