Intimidashon seksual ta inakseptabel.

Intimidashon seksual ta inakseptabel.
 

For di investigashon realisá resientemente a keda prueba ku 33% di nos forsa laboral ta wòrdu seksualmente intimidá na boka di trabou. 25.000 hende hòmber i muhé segun e investigashon ta wòrdu hostigá seksualmente na trabou. Físikamente, verbal i ku akshon trahadónan ta wòrdu intimidá.
 
Parlamentario i lider di frakshon di Partido PAR sra. Ana Maria Pauletta a tene un kombersashon ku sra. Karin Bosman ku a dirigí e investigashon tokante e tema aki. Puntonan ku a bin dilanti ta ku 57% di e víktima nan no ta entregá un keho pa bèrgwensa òf pa miedu pa pèrdè nan trabou. Intimidashon ta wòrdu tapa bou di kapa di man lòs, kultura i amistat.
 
Segun señora Pauletta intimidashon seksual su impakto riba e víktima ta devastador. E ta sigui splika: ‘Bo ta pasa 8 ora, den sierto kaso mas ora, na bo trabou pa bo traha desentemente pa bo komunidat i tambe pa krea stabilidat finansiero pa bo famia i bo tin ku haña bo konfrontá komo empleado ku e situashon aki. Esaki ta algu inakseptabel.
 
Mester traha urgentemente riba un kuadro hurídiko pa atendé i para intimidashon seksual na boka di trabou. Huntu ku e instansia nan tantu gubernamental, komo no gubernamental tin ku bin ku un plataforma pa atendé ku esaki di un forma strukturá. Den kuadro di esaki Sra. Pauletta lo tin un sita 7 di yüli próksimo ku gruponan no gubernamental ku ya kaba ta trahando riba e tereno di abuso i intimidashon seksual.’
 
Ta klaro ku intimidashon seksual na boka di trabou ta un problema serio i ku ta rekerí atenshon inmediato i kontundemente.  Sra. Pauletta huntu ku Frakshon di PAR den su totalidat lo atendé ku e situashon aki i kuminsá traha riba e konsientisashon nesesario, kuminsando den Parlamento i tambe den gobièrnu.
 

Ana-Maria Pauletta
Member of the Parliament of Curaçao

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: