Spich di Reunion Solem Dia di Bandera ku Lider di Frakshon di MAN sra Elsa Rozendal a hiba.
Willemstad – Durante e reunion Solèm, den kuadro di selebrashon di Dia di Bandera, djadumingu 2 di yüli último, señora Elsa Rozendal, lider di frakshon di partido MAN a kompartí e siguiente spich ku kolega parlamentarionan i pueblo di Kòrsou.
Honorabel señor Presidente, koleganan i pueblo di Kòrsou Pabien i Felis Dia di Bandera!
Awe nos ta para ketu na e di 33 aña di selebrashon di nos bandera.
Nos bandera ta un di e identidatnan di mas importante di nos pais. Nos bandera ta konta un historia i e ta símbolisá desaroyo di nos pais. Tur aña riba 2 di yüli nos ta para ketu i duna realse na nos bandera.
Pero kiko ta e sintimentu ku nos komo yunan di Kòrsou ke sinti ora nos para ketu i duna realse na nos bandera? Kiko nos komo yunan di Kòrsou ke pa otronan, den mundu, sinti ora nan mira nos bandera bula i tende nos himno zona?
Mi ta maginá mi ku nos komo yunan di Kòrsou ke pa kada un di nos i otronan den mundu sinti un satisfakshon i orguyo inmenso ku apenas nos por wanta nos emoshon i nos wowonan di yena ku awa ora ku nos bandera ta bai laira, mientras nos himno ta zonando.
Den mas profundo di nos kurason nos tur ke mira un Kòrsou sin kriminalidat, un Kòrsou kaminda tin oportunidat real, ku trabou pa kada un di su yunan, un Kòrsou ku ta duna nos muchanan oportunidat pa desaroyá nan máksimo potensial, un Kòrsou ku tin un sistema di salubridat i kuido di kalidat haltu, un Kòrsou di prosperidat i oportunidatnan igual pa un i tur por hiba un bida digno.
Ta esaki nos komo yunan di Kòrsou ke pa ta e sentimiento ku nos yunan ta sinti ora nan mira nos bandera bula i tende nos himno zona. Nos ke pa nan tin un sentimiento di orguyo inmenso. Nos ke pa nan por identifiká nos bandera ku kosnan positivo i progreso di nos pais.
Pa nos por duna realse berdadero na nos bandera i krea e sentimientu aki, nos mester atendé e retonan den nos pais, na un manera serio i konsistente.
Nos mester garantisá nos yunan i tur hende ku ke aportá positivamente na nos komunidat, trabounan duradero.
Nos mester krea barionan kaminda nos yunan por lanta seif i ku tur e fasilidatnan pa nan por desaroyá nan mes.
Nos mester brinda nos yunan oportunidat den enseñansa pa nan por desaroyá e talento ku nan a nanse kuné i keda formá den hende muhé i hende hòmber ehemplar.
Nos mester forma siudadanonan ehemplar ku ta yuda karga i fortifiká nos ekonomia i hiba Kòrsou dilanti.
Nos mester trese kambionan fundamental den nos pais i nos mester wak dilanti en bes di keda wak atras.
Sokrates a yega di bisa: E sekreto pa logra kambio ta pa enfoká tur bo energia riba konstruí e nobo i no riba bringa e bieuw.
Ban husa tur nos energia pa…
Uni en bes di bringa otro.
Pa traha kolektivamente na progreso di nos pais.
Pa karga nos responsabilidat síviko i demostra ku nos ta un bon Yu di Kòrsou.
Ban demostrá nos sentido di patriotismo salí for di den nos kurason i nos alma.
Ban enfoká riba loke realmente nos mester hasi pa logra e kambionan ku nos ta deseá.
Ban enfoká tur nos energia riba krea e Kòrsou Nobo i asina duna realse berdadero na nos bandera.
Un biaha mas pabien na pueblo di Kòrsou. Biba nos bandera i Biba Kòrsou!
