KONSEHO DI HUBENTUT KU ORGUYO TA PRESENTA UN GRABASHON NOBO DI HIMNO NASHONAL DI KÒRSOU

KONSEHO DI HUBENTUT KU ORGUYO TA PRESENTA UN GRABASHON NOBO DI HIMNO NASHONAL DI KÒRSOU

Willemstad – E Konseho di Hubentut di Plataforma Nashonal pa Desaroyo di Hubentut, ku orguyo ta presentá un produkshon nobo di Himno Nashonal di Kòrsou pa Dia di Bandera riba 2 di yüli 2017. Esaki den koperashon ku 17 kantante hóben i hóben adulto, kompañá pa Dennis Aalse Youth Orchestra ku presentashon di 29 hóben músiko. Konseho di Hubentut ta konsistí di 9 hóben eligí i e hóbennan aki a kordiná i ehekutá henter e produkshon ku sosten di Gobièrnu di Kòrsou, Plataforma Nashonal pa Desaroyo di Hubentut i algun boluntario. E hóbennan ku ta forma parti di e Konseho di Hubentut ta Kennen Elvilia,Giömy Klepper, Damian Barreto, Alice Plate, Mike Brissett, Jeannello Haddocks, Eunice Dolorita, Kaverly Elvilia, Maxwell Brigitha.

Konseho di Hubentut kier yama sigur Dennis Aalse i Dennis Aalse Youth Orchestra i tur artista ku a partisipá un mion di danki pa un tremendo kolaborashon: Aemy Niafeliz, Randy Leroy, Harliane Brazil, Tyeisha Bernabela, Kadir Snijders, Raynor Lauffer, Gilltaly Doran, David Hugo, Pharon ‘Fireon’ Pilgrim, Andrew Aalse, Heinrich Pieter, Rashid Felida, Quiwena Afra, Deborah Gomez, Diveana Martina-Lopez, Charelson “Sontje” Mercelina i Naomi Silvanie.

Konseho di Hubentut ta un konsulta di hóben ku ta kompartí opinion riba kiko ta importante pa hóbennan, ta representá nan interes i ta forma un punto di kontakto entre gobièrnu i hóbennan. E Konseho di Hubentut ta duna konseho na Plataforma Nashonal pa Desaroyo di Hubentut i gobièrnu riba e tema di maneho di hubentut i desaroyo di hubentut. E Konseho di Hubentut mes tambe lo organisá aktividat pa stimulá partisipashon di hubentut den desishonnan i aktividatnan di importansia pa desaroyo di hubentut. E intenshon ta pa tene selekshon regularmente di hóbennan pa forma parti di e Konseho di Hubentut. Kada Konseho di Hubentut ta fórmula un manifesto ku algun prioridat ku nan kier traha riba dje. Den kuadro di maneho di ehekushon di su proyektonan a yega na un manifesto ku seis prioridat.
Ku e grabashon di Himno Nashonal di Kòrsou Konseho di Hubentut ta realisá number dos di su manifesto “Stimulá tur hende, espesialmente hóbennan pa siña i hasi uso di tur ocho kuplèt di nos Himno”. Ademas ke presentá algu atraktivo pa hóbennan mira i skucha. E vishon ta pa tur hóben na Kòrsou siña i haña esaki tende na tur skol i via medionan di komunikashon. Konseho di Hubentut a logra su meta pa terminá ba tempu pa por presentá esaki na pueblo di Kòrsou dia 2 di yüli 2017, Dia di Bandera.

Dennis Aalse i Dennis Aalse youth orchestra tabatin enkargo di e parti muzikal i grabashon oudio tabata den man di Jego di TMZ studio. Vio Sambo films a hasi filmashon di edit i por a haña algun imagen di Kòrsou kortesia di Caribbean Legacy.E oudio i video ta disponibel pa tur persona òf instansha interesá tantu lokal komo internashonal ku ke presentá nos Himno Nashonal pa un okashon ofisial òf spesial. Por mira e grabashon tambe riba e página di Facebook di Konseho di Hubentut i youtube Desaroyo di Hubentut. Pa un kalidat di resolushon mas haltu lo proveé tur instansha ofisial, organisashonnan interesá, medionan di komunikashon i medianan sosial e grabashonnan. Interesadonan por manda su petishon via mail info@desaroyodihubentut.cw i konsehodihubentut@gmail.com

Plataforma di Desaroyo di Hubentut ta orguyoso ku e kompromiso i dedikashon ku e hóbennan di Desaroyo di Hubentut a demostrá durante algun siman pa logra nan meta i spera di por sigui konta ku sosten di e.o. gobièrnu di Kòrsou i tur e organisashon i boluntarionan ku a pone nan skouder bou di e proyekto pa asina por sigui traha na bienestar di nos hubentut i porvenir di Kòrsou.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: