Klaridat pa loke ta trata disponibilidat di fondo pa studiantenan bai studia den region

Minister di Enseñansa, Siensia, Kultura i Deporte
Sra. Merelyn Alcala Walle.
Bon Bini Business Centrum Schottegatweg-Oost 10
Presente

Kòrsou, 6 di yüli 2017

Tópiko: Klaridat pa loke ta trata disponibilidat di fondo pa studiantenan bai studia den region.

Apresiable Minister Alcala Walle

Diferente mayor ku tin yu ku a registrá pa bai studia den region tin un angustia i inkietut pasobra te ainda no tin klaridat si e studiante por kumpli ku nan soño i haña posibilidat pa bai studia manera nan ta deseá. Den kombersashon ku algun mayor di studiantenan ta informá ku nan a hasi tur trámitenan pa nan yunan por bai studia den region pero ku te dia di awe nan no a haña tende serka SSC si nan petishon a ser aprobá i ki dia nan por kuminsá prepará pa bai. E flecha ta aserkando i te ainda no tin klaridat pa loke ta trata e situashon aki. Di un Fuente ku ta bon na altura nos a komprondé ku pa loke ta trata e studiantenan ku tin di studia den region SSC a aserka gobièrnu ku petishon pa pone un suma di 4.4 mion na nan disposishon. Ku ta loke nan mester e aña aki pa kubri e gastunan. SSC a risibí for di gobièrnu promé un montante di 700.000 florin sigui pa 1.5 mion florin pa kual ta suma un total di 2.2 mion ku ta mitar di loke tin mester pa garantisá ku tur e studiante por bai studia. Pues na e momentu nan aki tin un insertidumbre. No tin klaridat si tur e studiante lo por bai studia den region. Hasta t’asina ku SSC ta kontemplando pa komuniká na e mayornan di e studiante ku kasi sigur pa falta di fondo nan mester warda te otro aña pa kuminsá ku nan estudio loke ta algu insulto. Esaki ta inaseptabel anto sigur pa un gobièrnu ku ta bisa ku lo e pone hopi atenshon na nos enseñansa.

Mas ainda ku den e akuerdo di gobernashon di e gobièrnu aktual a kombení pa loke ta parti di Enseñansa , i mi ta sita : “ Realisá e konekshon pa sigui estudionan den eksterior, tantu regional komo na Europa i kontinuá ku stimulashon di estudionan superior den region “ Fin di sita.

Teniendo kuenta ku loke tin stipulá den e akuerdo di gobernashon i posibel problema ku ta vislumbrá pa loke ta trata studia den region, na nòmber di frakshon di MAN mi ke hasi algun pregunta na nos Minister di Enseñansa.

1. Minister ta na altura di e posibel problema ku ta vislumbrando den sentido ku no ta tur studiante ku a registrá pa bai studia den region por hasi esaki pa motibu di inkumplimentu di Gobièrnu?
2. Ta bèrdat ku gobièrnu no a pone e fondo kompletu nesesario disponibel pa SSC pa asina garantisá ku e studiante por bai studia den region sin niun problema?
3. Minister por informá nos (komunidat) ki te pasonan ku Minister lo bai tuma pa solushoná e problema aki mas lihé ku ta posibel di manera ku SSC por dispone di e fondonan nesesario pa asina trese trankilidat pa e studiante lo tin e posibilidat pa bai sigui nan studio?

Sperando di haña kontesta riba mi pregunta nan i tambe koperashon di Minister pa resolvé e problema aki mas pronto posibel mi ta despedí,

Atentamente,

Na nòmber di Frakshon di MAN
Wimbert Hato
Miembro di Frakshon MAN den Parlamento di Kòrsou

This site uses Akismet to reduce spam. Learn how your comment data is processed.

%d bloggers like this: