Mayornan ta mira desaroyonan den enseñansa ku preokupashon, Rema Uni kier ta parti di e solushon

Mayornan ta mira desaroyonan den enseñansa ku preokupashon, Rema Uni kier ta parti di e solushon
ReMa Uni, representashon di mayornan den enseñansa ta preokupá pa e desaroyonan di últimamente den enseñansa i ta spera ku  pronto bin un solushon pa tantu e e dilema rondó di enseñansa liber i bin klaridat pa nos studiantenan tokante funshonamentu di   SSC.

Siman pasa ReMa Uni a instalá un direktiva interino, ku sufisiente hende dinámiko ku ta bai  atendé tur e retonan ku nos mayornan ta enkontra den nos enseñansa. 

ReMa Uni ke  ta parti di solushonnan pa ku e retonan den nos enseñansa i pa e motibu aki nos ta bai dediká nos mes na  hasi nos trabou ku hopi dedikashon, skuchando tur partido, pa na final yega na e solushon ku ta akseptabel pa nos mayornan i nos muchanan ku ta parti di nos enseñansa. E punto di bista di ReMa Uni ta ku nos ta para pa un trato igual na nivel di kada mucha denter di un enseñansa di kalidat haltu.
Den e kuadro aki nos ta urgi señora Minister  di MOWCS i SSC sinta na mesa pa solushoná e preokupashon di nos studiantenan ku ta i ta bai studia den regio pa nan por tin un garantia pa ku finansiamentu di nan estudio mas  pronto ku ta posibel pa ningun ningun di nos hóbennan sali perhudiká. ReMa Uni ta dispuesto na duna su aporte konhuntamente ku mayor di e studiantenan aki pa yega na un solushon a korto plaso. Alabes ta importante pa nos ta na altura di desaroyonan den SSC i plannan pa futuro  pa asina nos por yuda kita e insertidumbre ku nos studiantenan ta aden aktualmente.

Ta p’esei ReMa Uni ta urgi tur partidonan,ban demonstrá huntu ku di bèrdat nos tin nos enseñansa na pechu.

Próksimamente ReMa Uni den un konferensia di prensa, lo bai laga komunidat sera konosí ku nos direktiva interino i tambe informá pueblo di  plannan di e organisashon pa e aña eskolar  binidero. Nos kier kòrda mayornan ku e organisashon aki ta unu di i pa nos mayornan pa huntu nos yega na un enseñansa ku ta karga aprobashon di tur mayor di Korsou

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: