Preparashon Programa di Urgensia huntu ku bario

Preparashon Programa di Urgensia huntu ku bario

Willemstad – Gabinete Rhuggenaath a palabrá pa denter di tres luna presentá un programa di urgensia pa kombatí pobresa den barionan na Kòrsou. Den e kuadro akí durante último simannan tabatin kombersashon ku diferente organisashon i personanan ku konosementu di trabou den bario i strategianan pa kombatí pobresa na nivel di bario. A hasi análisis a base di diferente rapòrt ya trahá den pasado, tokante desaroyo den bario. Tabatin alabes seshonnan ku e ministerionan i algun bario.

Segun entre otro ekspertonan di UNDP, pa kambia e situashon di pobresa den un bario di un forma sostenibel, ta importante pa kombiná algun aktividat ku otro i ehekutá esakinan huntu. Mirando intensidat di un strategia asina, no ta konsehabel ni posibel pa kuminsá ku tur bario pareu. P’esei a skohe tres bario pa kuminsá kuné repartí riba Kòrsou. Siman pasá a sigui ku enkuentronan ku e barionan akí, esta Montaña, Buena Vista i Barber. Huntu ku un grupo di habitante i organisashonnan den kada un di e barionan, tambe ku plataforma di Bándabou, a trata e diferente tema- i aktividatnan pa huntu konkretisá esakinan pa kada bario.
E aktividatnan ta dirigí riba e mesun temanan menshoná den e plan Nashonal di Kòrsou i e metanan sostenibel ku na nivel internashonal a palabrá pa paisnan traha ariba. Trahando di e forma akí Kòrsou tin e posibilidat tambe pa bira un modelo pa kon ta kombatí pobresa di un forma sostenibel. Intenshon ta pa aki dos siman finalisá e programa di urgensia pa Konseho di Minister aprobá esaki i pa kuminsá ku ehekushon na luna di sèptèmber próksimo.

Foto:
Riba e fotonan ta mira Minister Presidènt den kombersashon ku bario di Buena Vista, Montaña i Plataforma Bándabou pa e bario di Barber.