Ministerionan ta deliberá riba Programa di Urgensia

Ministerionan ta deliberá riba Programa di Urgensia

Willemstad – Djabièrne merdia 28 di yüli último, ambtenarnan di diferente ministerio di gobièrnu a bini huntu pa sigui deliberá riba kontenido di e Programa di Urgensia. Tabata presente Ministerio di SOAW, OWCS, GMN, Hustisia i Polis (Top C), VVRP, MEO i Asuntonan General. Minister Presidente sr. Rhuggenaath tabata presente na komienso di e reunion pa e mustra su apresio pa e bon trabou ku e ambtenarnan ta hasiendo. Ela enfatisá kon importante e koperashon aki entre ministerionan ta, pa desaroyá i tambe ehektuá despues e Programa di Urgensia ku mester por kuminsá trese speransa bèk den komunidat.
E reunion a kana den un esfera hopi positivo te atardi lat. Despues di un introdukshon kòrtiku di e kuadro general di e Programa di Urgensia i alabes e relashon ku e programa di gobernashon, a parti e ambtenarnan den dos grupo pa sigui diskutí. A base di un lista di aktividat, kompilá entre otro for di e enkuentronan den bario anteriormente, a sigui elaborá e aktividatnan. Diferente informashon a bin dilanti tokante aktividatnan ku por hasi huntu pa kombatí pobresa, kuminsando den e tres barionan Buena Vista, Montaña  i Banda Bou, spesialmente na Barber.
E tim ku ta trahando riba e Programa di Urgensia awor ta bai finalisá e programa p’asina pronto Konseho di Minister aprobá esaki pa por kuminsá ku ehekushon na luna di sèptèmber próksimo.