Miembro di Parlamento di Partido Alternativa Real -PAR Stephen Walroud: Ta manda un karta pa Minister di Desaroyo Ekonomiko ku e titulo: Ponton Festival

Presidente di Parlamento di Kòrsou,

Señor William Millerson,

Wilhelminaplein # 4,

Alhier.
Djamars, 18 di aprel 2018

 

Tópiko: Ponton Festival

 

Apresiable sr. Millerson,

 

Pa medio di e karta aki mi ke hasi uso di artíkulo 96 di reglamentu di òrdu di Parlamento di Kòrsou i mi petishon ta pa dirigí e karta aki na Minister di Desaroyo Ekonómiko,
sr. Drs. Ivan S. Martina ku tin komo tópiko: Ponton Festival.

 

Atentamente,

 

Stephen Walroud

Parlamentario di Kòrsou

Minister di Desaroyo Ekonómiko,

Señor Ivan S. Martina ,

Pletterijweg 43,

Alhier.

 

Djamars, 18 di Aprel 2018

 

Tópiko: Ponton Festival

 

Apresiable minister Martina,

 

Manera ta konosí e evento musikal ‘Ponton Festival’ ku mester a tuma lugá riba 5, 6 i 7 di Aprel 2018 kontra di tur espektativa i sorprendentemente a wòrdu kanselá un (1) dia promé ku e evento mester a kuminsá. Esaki ku tur konsekuensia pa hende lokal ku a kumpra karchi, artista ku ya tabata na Kòrsou, turista ku a biaha bin Kòrsou pa e evento, kompanianan ku a hasi preparashonnan pa brinda tur tipo di servisio etc etc.

 

Ta kasi imposibel pa duna un rekuento kompleto di e daño ku e kanselashon di e evento aki a hasi na imágen di Kòrsou. Sigur si konsiderá e esfuersonan i rekursonan ku den kurso di añanan a wòrdu hinká di parti di CTB i CHATA den promoshon di Kòrsou komo un destinashon turístiko ku eventonan di taya unda bo por ta sigur ku e evento ta tuma lugá i ta tuma lugá manera programá. E pregunta kardinal ta: e debakel di e Ponton Festival unda kredibilidat di Kòrsou a wòrdu tachá, por a wòrdu prevení?

 

For di inisio ora den un rueda di prensa a lansa e evento pa mundu tuma nota, nos por a konstatá ku minister a sinta banda di e promotor di e Ponton Festival i duna komo minister sosten kompleto na e evento. Banda di esaki minister a ekspresá tambe sosten na e evenemento na nòmber di diferente organisashon ku ta kai bou di responsabilidat di minister. Aki mi ta referí na no solamente e Ministerio di Desaroyo Ekonómiko (MEO) pero tambe Curaçao Tourist Board (CTB), Curaçao Airport Holding, Curaçao Investment & Export Promotion Agency (CINEX) i Curaçao Ports Authority (CPA). Esaki ta mustra riba un gran konfiansa di parti di minister pa ku e potensial di e evento pero tambe den e promotor di e evento i den su organisashon.

 

E konfiansa ku a wòrdu mustrá den e promotor aki entretantu por wòrdu kuestioná seriamente. Sigur si tuma nota di tur loke den último dianan a sali na kla den medionan di komunikashon tokante e reputashon di e promotor pa loke ta trata eventonan musikal den pasado. Den e kuadro aki nos a komprendé ku no ta e promé biaha ku un evento musikal di e promotor aki ku artista internashonal riba e programa pa un motibu òf otro a keda kanselá.

 

No ta un sekreto ku pa organisá evento musikal internashonal bo mester sufisiente kapital propio (òf akseso na kapital) pa prefinansiá e evento sabiendo ku un gran parti di e entradanan di un evento ta drenta nèt un par di dia promé ku e evento i sobrá durante i hasta te despues di e evento.

 

 

Den e kuadro aki tin indikashon fuerte ku e promotor en kuestion no tabata tin sufisiente kapital propio i ku dor di esaki e evento mester a para. Esaki ku tur tipo di konsekuensia negativo pa hende, turista, kompania i imágen di Kòrsou komo destinashon turístiko.

 

Sin husga niun hende i hasiendo uso di mi derecho komo parlamentario, mi ta aserka minister ku e siguiente preguntanan konforme artíkulo 96 di reglamentu di órden di parlamento di Kòrsou:

  1. Ki dia òf kuantu tempu pasá minister a risibí e plan di e Ponton Festival?
  2. Ki dia òf kuantu tempu pasá spesífikamente CTB a risibí e plan di e Ponton Festival?
  3. Kuantu supsidio di CTB a wòrdu pidí na CTB di parti di e Ponton Festival?
  4. Kiko ta e prosedura den CTB ora drenta petishon di supsidio pa un evento? Kua ta e kriterianan spesífiko ku mester kumpli kuné ora hasi petishon pa supsidio pa un evento? Kua departamento ta hèndel esaki? Screening di e promotor i/o kompania di e promotor ta parti di e proseso/prosedura? Ken ta tuma e desishonnan aki i kon esakinan ta wòrdu tumá?
  5. Kuantu supsidio di parti di CTB a wòrdu otorgá na Ponton Festival i di ki forma Ponton Festival lo (a) risibí esaki?
  6. Kuantu suisidio di parti di CAP a òrdu otorgá na Ponton Festival i di ki forma Ponton Festival lo (a) risibí esaki?
  7. Kuantu supsidio di parti di CINEX a wòrdu otorgá na Ponton Festival i di ki forma Ponton Festival lo (a) risibí esaki?
  8. Kuantu supsidio di parti di CPA a wòrdu otorgá na Ponton Festival i di ki forma Ponton Festival lo (a) risibí esaki?
  9. Den kua merkado CTB a promoshoná e Ponton Festival? Di ki forma spesífiko a hasi esaki pa kada merkado i kuantu esaki a kosta pa kada merkado?
  10. Por kuantifiká e daño hasí na imágen di Kòrsou pa loke ta trata e esfuerso kontinuo pa promové Kòrsou komo e ‘Stage of the Caribbean’?

Parlamento den tratamentu di presupuesto 2018 riba 21 di desèmber 2017 a bai di akuerdo ku un moshon unda spesífikamente pa loke ta trata evento, gobièrnu ta wòrdu urgí pa rekonosé e importansia di e papel di evento den desaroyo di nos produkto turístiko i den e kuadro aki aloká fondo adishonal pa fortifiká CTB su departamento konserní ku ta dil ku evento ku potensial turístiko.

  1. Kuantu fondo CTB a reservá pa supsidiá evento na 2016, 2017 i (despues di e moshon) na 2018?
  2. Kuantu fondo CTB realmente a supsidiá evento na 2016 i 2017 i na kua evento?

 

 

  1. Di promé di yanüari 2018 te ku 15 di aprel 2018, kuantu di e fondo ya a wòrdu huzá na supsidio i na kua evento?
  2. For di 15 di aprel 2018 te ku fin di aña 2018, kua evento ya a haña aprobashon di CTB pa loke ta trata supsidio/sosten i pa kuantu sèn?
  3. Kon for di ángulo di minister i CTB por a evitá i prevení loke a pasa ku e Ponton Festival? Kon por intensivá e parti di screening pa huzga si un promotor tin sufisiente kapital propio òf akseso na kapital?

 

Atentamente,

Stephen Walroud

Parlamentario di Kòrsou

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: