Petishon di parti di frakshon di MFK pa dos (2) reunion publiko

Petishon di parti di frakshon di MFK pa dos (2) reunion publiko.

Défisit riba presupuesto di aña 2019, no ta 126 mion manera Minister Gijsbertha i gabinete Rhuggenaath a indiká, pero konforme CFT mester pone 100 mion mas riba e défisit ku lo bira en total 226 mion florin

Kòrsou su teritorio a wòrdu pone disponibel dor di gabinete Rhuggenaath komo Hub-Humanitario i/òf nos teritorio ta disponibel tambe pa Merka por trese otro materialnan i/òf ekiponan ku no nesesariamente ta pa ayudo humanitario .

Willemstad, 2 di aprel 2019

 

Na Presidente di Parlamento

Señor W. Millerson

P/a Wilhelminaplein # 4

PRESENTE

 

Tópiko: Défisit riba presupuesto di aña 2019, no ta 126 mion manera Minister Gijsbertha i gabinete Rhuggenaath a indiká, pero konforme CFT mester pone 100 mion mas riba e défisit ku lo bira en total 226 mion florin

 

Señor Presidente,

 

Frakshon di Movementu Futuro Kòrsou (MFK) ke hasi uso di su derecho konforme artíkulo 64 insiso 4 di nos Reglamentu di Ordu (RvO) i ta aserka bo persona di pa konvoká un reunion públiko urgente ku e tema ariba menshoná.

 

Frakshon di MFK a tuma nota den e karta di CFT fecha 1 di aprel 2019, ku aparte di e défisit di 126 mion, pa kual Minister Gijsbertha a presentá un pakete di medida na Parlamento. Ku CFT awor ta indiká ku pa e presupuesto di aña 2019, mester añadí 100 mion mas. Ku otro palabra e défisit riba presupuesto 2019 ta 226 mion florin.

 

Banda di esaki ainda falta 200 mion florin pa Hospital Nobo na Otrabanda, gobiernu a keda di presentá na Parlamento un “Bussines Case”, loke te ku awe no a tuma lugá.

 

Kòrsou a wòrdu degradá pa Standard & Poor’s di un “rating” di A- pa BBB+.

Likides di Kòrsou a yega te na 0.7%, miéntras ku debe nashonal di Kòrsou a subi yega te na 45% di Kòrsou su Produkto Nashonal Bruto.

 

E maneho finansiero hiba pa gabinete Rhuggenaath ta motibu pa hopi iritashon serka siudadanonan. Pueblo di Kòrsou no ta mira perspektiva den e maneho ku gabinete Rhuggenaath ta hibando.

 

Frakshon di MFK pa medio di esaki ta pidi Presidente di Parlamento pa yama e reunion aki ku karakter di urgensia i invitá Minister Presidente Eugene Rhuggenaath i Minister di Finansa i Ekonomia señor Kenneth Gijsbertha pa bin Parlamento i pa gobiernu manda tur karta i dokumentonan relevante pa Parlamento promé ku e reunion, pa Parlamento por debatí ku e Ministernan i pa nos sa kon gabinete Rhuggenaath tin pensa pa solushoná tur e problemanan ariba menshoná.

Atentamente,

Gilmar Pisas

Charles Cooper

Jacinta Constancia

Gilbert Doran

Juniël Carolina

 

Willemstad, 8 di aprel 2019

 

Na Presidente di Parlamento

Señor W. Millerson

P/a Wilhelminaplein # 4

PRESENTE

 

Tópiko: Kòrsou su teritorio a wòrdu pone disponibel dor di gabinete Rhuggenaath komo Hub-Humanitario i/òf nos teritorio ta disponibel tambe pa Merka por trese otro materialnan i/òf ekiponan ku no nesesariamente ta pa ayudo humanitario

 

Señor Presidente,

 

Frakshon di Movementu Futuro Kòrsou (MFK) ke hasi uso di su derecho konforme artíkulo 64 insiso 4 di nos Reglamentu di Ordu (RvO) i ta aserka bo persona di pa yama un reunion públiko ku e tema ariba menshoná.

 

Nos por a tuma nota den medionan lokal i riba retnan sosial deklarashon di un Minister di Rusia ku Kòrsou su teritorio a wòrdu pone na disposishon di Merka pa un eventual intervenshon militar na Venezuela. Gabinete Rhuggenaath no a duna un reakshon ofisial riba e akusashonnan di Rusia.

 

Tambe nos a tuma nota deklarashonnan di promé Minister Rhuggenaath ku ni arma ni ekiponan militar por drenta nos teritorio sin ku gabinete Rhuggenaaht duna su aprobashon na esaki.

 

E dos deklarashonnan aki a lanta nos preokupashon debí ku den Parlamento promé Minister Rhuggenaath a deklará ku Kòrsou lo sirbi solamente komo un Hub-Humanitario pa distribushon di alimento pa e teritorio venezolano.

 

Frakshon di MFK komo representante di pueblo den Parlamento i komo e frakshon ku e representashon mas grandi voto den Parlamento ta radikalmente kontra pa promé Minister Rhuggenaath pone nos pueblo su seguridat na peliger i pa krea pániko en nos sosiedat.

 

Frakshon di MFK pa medio di esaki ta pidi Presidente di Parlamento pa yama e reunion aki ku karakter di urgensia i invitá promé Minister Rhuggenaath i tambe pa pone na disposishon di Parlamento tur dokumento ku gobiernu di Kòrsou i Hulanda a firma ku Merka relashoná ku e situashon na Venezuela.

 

Atentamente,

Gilmar Pisas

Charles Cooper

Jacinta Constancia

Gilbert Doran

Juniël Carolina