UNSEBAKO SU GUERA KONTRA DI SEFBA A INTENSIVÁ

UNSEBAKO SU GUERA KONTRA DI SEFBA A INTENSIVÁ

For di su salida na aña 2014 UNSEBAKO (Union di Sentronan di Bario Kòrsou) ta den konflikto ku SEFBA (Fundashon pa Stimulá Edukashon i Formashon di Bario), pero e konflikto aki awor ta desembokando den un guera kasi sangriente, ku atakenan personal i intriganan sumamente ferfelu, pasando riba kabes di direktivanan di sentronan di bario bai. UNSEBAKO a haña ku e mester pone preshon riba gobièrnu pa likidá e organisashon ku gobièrnu mes a lanta i ku ta enkargá ku supsidio na sentronan di bario, esta SEFBA. Pero ta un guera ku sigur ministernan Ivar Asjes i señora Ruthmilda Larmonie Cicilia por konfirmá. E guera tenas aki ku a intensivá ta bini na masha mal momento. Hopi hende na Kòrsou ta prekupá pa e situashon ku nos isla ta aden. Masha suidadano yu di Kòrsou a pèrdè trabou, empresanan a sera i retirá trahadó, oumento di pobresa, plaka no ta lora den e komunidat aki, vários di nos hendenan ta buska manera di bandoná Kòrsou, esei komo ku problemanan sosial ta birando di mas. Pa kolmo e situashon na pais bisiña “Venezuela” tin su impakto riba nos, anto ningun hende no sa kiko lo para di e refineria (sí e ta keda habrí òf e ta sera), un grupo grandi di suidadanonan indokumentá ta drenta aki pa buska un mihó bida. Tur e puntonan menshoná finalmente ta kulminá den paralisashon total di e situashon di nos isla. Pero, no opstante tur loke ta pasando, nos tin e oportunidat di oro pa hasi e kosnan di otro manera. Ami ta mantené e punto di bista ku Kòrsou su posibilidat di progresá ta sintá den trabounan intensivo i konsiente na base, den nos barionan, den esfuersonan realmente dirigí pa krea situashonnan sano i aseptabel den nos barionan. Mester traha na un komunidat saliendo for di e prinsipio ku desaroyo di barionan ta instrumental pa progreso di e isla aki. Na Kòrsou bèk fo’i Ulanda m’a introdusí na aña 1995 e programa “Bario pa Bario t’esei ta Kòrsou”, ku ta práktikamente e mesun titulo di mi skripsi durante mi estudio na Akademia Sosial di Eindhoven. Mi a duna tur hende oportunidat pa bini den e programa i ekspresá liber pasobra nunka no tabata mi intenshon pa pretendé ku ta mi so lo sa di e importansia di bario, kiko ta bon pa nos barionan. Ta mi konvikshon ku e situashon kaminda bo tin un grupo chikitu di barionan ku ta den un situashon kómodo, siendo e gran mayoria ta den sirkunstansianan inaseptabel ta un menasa permanente i serio pa adelanto i progreso di nos isla, e ta ademas un menasa pa seguridat i stabilidat en general. E tema bario mas bien mester sirbi pa uni nos komunidat. Ta bini aserka ku pa un yu di Kòrsou subi avion bai Ulanda awendia pa buska un mihó porvenir e no ta nada fásil, pasobra gobièrnu ulandes a krea kondishonnan ferfelu ku ta hasi estadia di yunan di Kòrsou ku ke bai establesé aya práktikamente imposibel. Asina e hende ei yega Ulanda e mester demostrá ku e tin trabou, ku e tin entrada i estadia garantisá. Ke men e opshon di subi avion bai Ulanda ku tur e kondishonnan imponé, ta opstákulonan serio ku gobièrnu ulandes a pone den kaminda i ta hasi baimentu Ulanda pa biba kasi imposibel. Pues solushon pa nos problemanan, segun mi ta aki mes. Nos mester busk’é, serka nos mes hendenan dor di pone tur konosementu huntu i traha realmente pa drecha e situashon sosial den nos barionan. Tin áreanan konkreto i interesante pa hasi esei, anto ta plantashon i krio di bestia, ta turismo, pero ta tambe limpiesa di Kòrsou. Ta retonan interesante, posibilidatnan grandi pa Kòrsou avansá den poko tempu, pero mester drenta nos barionan, aktivá, guia i motivá habitantenan di bario pa sa kon yuda nan mes i nan famia i aki sin duda tin tarea pa sentronan di bario i demas organisashonnan aktivo den bario. Nos no mester ke biba den un komunidat ku tin hopi inhustisia sosial, pobresa, i krímen haltu. Pero ta yu di Kòrsou ami tambe ta i mi sa na unda e peligernan ta sinta, e ta den e aktitut di sierto figuranan ku ke demostrá ku nan tin mas skol, nan ta mas inteligente, nan sa mas, anto fásilmente e arogansia apsurdo ei ku nunka ta keda ekspresá, pero sí ta manifestá pasobra ta nan so mester tur poder, tur gloria i fama! Rumannan fásilmente nos por pone kabesnan huntu pa sòru ku denter di 8 pa 10 aña 30 a 40 porshento di nos ekonomia ta drei riba Turismo, plantashon i krio di bestia, limpiesa di Kòrsou (limpiesa di Kòrsou kombiná ku promoshon grandi di e isla aki). Ora ku ta papia di turismo naturalmente ta inkluso e ekonomia oraño, esta kultura, músika, arte etcetera. Enfin, esei ta segun mi e trayekto ku SEFBA, UNSEBAKO i Unidat di Bario mester kana huntu pa sirbi Kòrsou.

Erwin Raphaëla

Erwin Raphaëla

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: