PAR TA FELISITÁ NOS HÓBENNAN KU LOGRO ARTE DI PALABRA NA ARUBA

PAR TA FELISITÁ NOS HÓBENNAN KU LOGRO ARTE DI PALABRA NA ARUBA

 

Den fin di siman pasá a tuma lugá na Aruba e kompetensia di Arte di Palabra entre islanan Aruba, Boneiru i Kòrsou den kua hóbennan ganadó di Arte di Palabra na e respektivo islanan a tuma parti.

A otorgá un total di diesocho premio partí den seis diferente kategoria. Den esaki Kòrsou tabatin representashon masha fuerte i nos hóbennan a konkistá nuebe premio, inkluso e promé puesto den kuater di e seis kategorianan di kompetensia. Ku e logro bunita aki nos hóbennan ta demonstrá un biaha mas ku nos idioma Papiamentu ta bibu i ku e ta sirbi hubentut tambe komo un fuente importante di ekspreshon artístiko, tantu den forma di poesia komo prosa i kuenta.

Frakshon di PAR ta felisitá Sra. Ange Jessurun i su ekipo di Arte di Palabra di Kòrsou ku un biaha mas a prepará i guia nos hóbennan pa kompetensia. Palabra di elogio tambe pa e guianan di Boneiru i Aruba, ku a sa di organisá un kompetensia di nivel haltu. Felisitashon masha spesial na tur nos hóbennan ku a representá Kòrsou den e kompetensia i na e respektivo skolnan ku nan a representá:

Emmanuël Cathalina (Stella Maris College), Jordan Martis (Gouverneur Lauffer VSBO), Randyon Eleonora (SKAIH), Derickson Ellensburg (Joseph Civilis VSBO), Kyrsha Petrochi (SKAIH), Ruviensca Estachia (Joseph Civilis VSBO), Gyandro Marselia (MIL), Brooke Shields Goedgedrag (MIL).

Frakshon di PAR ta aploudí e promoshon di papiamentu den tur su aspektonan, inkluso den komunikashon di tur dia pero tambe den ekspreshon artístiko di nos hóbennan, loke ta yuda edifiká nos herensia kultural.  Spesialmente den e époka aki den kua e teknologia den komunikashon ta kasi eksklusivamente na un idioma ageno (ingles), ta esensial pa nos idioma papiamentu ta persibí di forma positivo serka nos hóbennan. Ku idioma papiamentu bon ankrá den bida di tur dia di nos hóbennan, lo por desaroyá di un manera dinámiko un sintimentu di identidat personal serka e hóben, i esaki por desaroyá tiki-tiki, poko-poko den un amor sinsero pa patria..

 

Gisette Seferina

Miembro di Frakshon

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: