DEMOKRASIA TA KEDA PREVALESÉ PARTIDO PIN A KEDA FUNDÁ FORMALMENTE

DEMOKRASIA TA KEDA PREVALESÉ PARTIDO PIN A KEDA FUNDÁ FORMALMENTE

Kòrsou – Riba e mesun fecha – 25 aprel 2018 – ku Kòrsou a konmemorá 70 aña di Derecho di Voto General, dirigentenan di Partido Inovashon Nashonal (PIN) a pasa e akta pa funda e asosashon di e partido na ofisina di notario Eshuis. Tur esaki a sosodé despues di un proseso demokrátiko den seno di PIN ku a kulminá den statutonan ku ta ankra e prinsipionan di Inovashon, Partisipashon, Òrdu i Speransa.

Lider Polítiko di PIN, sra. Suzy Camelia-Römer, Lider di Frashon di PIN, sr. Rennox Calmes i Presidente di PIN, sr. Alvin Daal a pone nan firma bou di e akta ku ta pasa statutonan di e asosashon den oranan di atardi. Esaki, despues ku algu mas ku un aña pasá nèt dos dia promé ku entrega di lista, un grupo basta grandi di tantu hóbennan komo esnan ku eksperiensha mas amplio den polítika a bini huntu, forma un lista bon balansá i entregá esaki na Konseho Supremo Elektoral. A hasi uzo di nos leinan riba partido polítiko pa a lanta e agrupashon polítiko pa su partisipashon na e elekshon. Manera ta bon konosí, den e simannan ku a sigui, PIN a sa di manda un mensahe kla ku a resultá den representashon den Parlamento, pero tambe bira un di e pilarnan ku yuda pa forma e Gobièrnu aktual.

E partido awor, den su bachi hurídiko nobo, por ta un ehèmpel pa hopi. Banda di su Direktiva i otro órganonan statutario, tin un Konseho Pólítiko basta amplio i sumamente representativo pa e diferente gremionan. Tambe e partido tin un Konseho di Partisipashon di Komunidat, ku ta un órgano spesífiko pa skucha kiko ta bati den kurason di pueblo di un manera strukturá, pa despues kombertí esaki den solushonnan duradero. Por mira atras riba un bon trabou di diferente kolaboradó, aktivista i dirigentenan ku huntu a sa di krea un struktura transparente kaminda tin sufisiente espasio pa inovashon i partisipashon real di miembronan di e partido.

PIN ta yama DANKI na tur esnan ku ta sostené e partido for di dia e partido a lanta i ku a keda loyal na e kousa.