DEN PRESENCIA DI MINISTERNAN BIKKER Y MADURO: AFPAKTEAM TA MIRA BACK RIBA UN PILOT-YEAR EXITOSO

DEN PRESENCIA DI MINISTERNAN BIKKER Y MADURO: AFPAKTEAM TA MIRA BACK RIBA UN PILOT-YEAR EXITOSO

E resultadonan di e prome aña di Afpakteam Integral di Aruba y di e cooperacion entre e partnernan den e cadena hudicial, a wordo presenta awe na minister di Husticia, Seguridad y Integracion y na minister di Finanzas, Asuntonan Economico y Cultura durante un reunion na Ministerio Publico.

Tanto e Procurador-General di Aruba, mr A. van Dam, como e Fiscal di Husticia di Afpakteam a tira vista riba e aña cu ta nos tras, pero tambe a wak padilanti pa (entre otro) bin cu formanan nobo pa traha hunto intensivamente y logra resultadonan mas mihor ainda.

E Afpakteam lo sigui dedica na crea condicionnan pa coopera cu otro.

Banda di esey Afpakteam ta trahando tambe na amplia su mes capacidad.

Minister Bikker a aproba caba e expansion di Afpakteam y e sessionnan di brainstorm durante e reunion di awe a trata mas tanto e realizacion y e completacion di esaki.

Procurador-General di Aruba a papia den su speech tocante e significacion di Afpakteam pa cu e sosten cu Fondo di Criminalidad ta duna na rechtshandhaving.

Afpakteam a tuma casi 6.6 miyon Florin den beslag den e aña cu a pasa.

E placa aki ta destina pa e Fondo di Criminalidad y lo wordo usa pa rechtshandhaving na Aruba.

E cen lo por wordo destina na inverti den (por ehempel) un radar, autonan di polis of aparatura di scan pa Aduana, y tambe na inverti den trainingnan y specializacionnan.

E gastonan di combatimento di criminalidad ta aumentando tur parti na mundo, tambe na Aruba.

Esey ta pasobra criminalnan ta bira dia pa dia mas spierto y ta haci mihor uso di inovacionnan tecnologico.

Husticia no por keda tras!

Actualmente ta trahando riba un areglo di good governance pa e Fondo di Criminalidad, den cual ta bay regla bon con capital criminal cu wordo tuma den beslag y kita, ta wordo destina. Minister di Husticia ta pone gran enfasis riba e areglo aki.

Afpakteam a cuminza traha riba prome di maart 2017 y ta un colaboracion di Ministerio Publico, Cuerpo Policial di Aruba, Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst), Marechaussee (KMar), Kustwacht Steunpunt Aruba, Meldpunt (Meldpunt Ongebruikelijke Transacties), y RST (Recherche Samenwerkingsteam). Afpakteam ta traha riba bringa criminalidad financiero economico.

Si bo persona sa di señalnan di labamento di placa, acerca Afpakteam na mail (afpakteam@kparuba.com) of tiplijn (telefon 11141)

Crimen no ta paga!

Riba foto: E Procurador-General cu minister Bikker y minister Maduro hunto cu representantenan di e ketenpartners di Afpakteam.