Barkunan Venezolano tabata na altura di reglanan vigente promé ku nan a regresá Kòrsou.

 

WILLEMSTAD-  Minister di Desaroyo Ekonómiko, Sr Steven Martina, huntu ku e tim multidisiplinario a tene un rueda di prensa pa trese aklarashon riba e situashon ku a surgi ku e barkunan di fruta den e dianan tras di lomba.

 

Huntu ku minister Martina tabata tei na e rueda di prensa aki, hefe di Inspekshon Ekonomiko di MEO, sr. Ronny Cornelis, representante di ministerio di salubridat, sr. Kelly, miembro di Douana, sr Casiano i tambe miembronan di servisio di imigrashon i KPC Sr. Gilberto Rodrigues i Sr. Alfred Suares.

Durante di e rueda di prensa Minister Martina huntu ku e miembronan presente di e tim multidisiplinario a trese dilanti ku e situashon ku e barkunan Venezolano no tabata na nodi yega na e punto aki mirando ku partidonan a sinta ku e 2 agensianan lokal representando e barkunan venezolano promé ku e barkunan a bandona estado di Falcón rumbo bèk pa Kòrsou. Esaki a sosodé inmediatamente despues ku a keda konosí ku e embargo a keda kitá dor di e presidente Venezolano.
Durante di e reunion aki a splika e agensianan detayadamente kiko ta e reglanan di entre otro  salubridat, pèrmitnan nesesario, reglanan di peso èts ku e barkunan Venezolano lo mester tene nan mes na dje unabes nan regresá Kòrsou.

Sinembargo durante di un kòntròl di e tim multidisiplinario dia 26 di aprel último a bin konstatá ku tabatin tòg diferente infrakshon ku tabata tuma  lugá pa ku e reglanan stipulá anteriormente. Por ehèmpel algun di e komersiantenan tabata stipulá preis di nan produkto na bista enbes di un preis pa peso òf unidad, algun no tabata disponé di un manera adekua pa pisa nan produktonan i a mustranan tambe riba e deber di pone un lista ku preis visibel pa nan klientenan. Tambe a kontrolá riba posibel importashon di fruta i berduranan pa kual un komersiante tin mester di un eksonerashon i a bin interseptá un kantidat di fruta pa kua no tabatin e eksonerashon nesesario. Aparte di esaki funshonarionan di Ministerio di Salubridat a tuma nota ku algun di e komersiantenan no tabata dispone di un karchi di kùr bálido i ku apesar di atvertensia tabatin frutanan kòrta pa bende sin ku tabata disponé di un sistema di koeling pa tene esakinan aden. Durante di e kòntròlnan aki tambe e tim multidisiplinario a rekordá e komersiantenan ku nan lo no tin mag di bandoná e area destiná pa nan.

Dia promé di mei último e tim multidisiplinario konsitiendo di miembronan di Kuerpo Polisial, Imigrashon, Duana, ministerio di salubridat i MEO a bolbe hasi un kòntròl pa por wak si a hasi kambio na e infrakshonnan ku a konstatá durante e kòntròl di dia 26 di aprel. Aki a bin konstatá ku ketubai diferente di e infrakshonnan ku a keda tresé na nan atenshon previamente no a keda solushoná. Aparte di esaki algun di e tripulantenan di e barkunan aki a sali, kontrali na reglanan vigente, i bende merkansia den un trùk pafó di e area destiná.

Pa motibu di e diferente infrakshonnan konstatá i mirando ku na mas ku un okashon a duna e komersiantenan aki e oportunidat pa drecha e lokenan ku  tabata kanando robes, e tim multidisiplinario resientemente a haña su mes ta tuma medidanan nesesario.