Gobièrnu di Kòrsou ta prepará pa temporada di orkan 2018

Willemstad – Den kumplimentu ku e lei pa kalamidat, e ‘Landsverordening Rampenbestrijding’ i e plan di kalamidat di Gobièrnu, koleganan di e diferente instansia di e ‘Rampenbestrijdingsorganisatie’ Kòrsou a atendé e ‘National Hurricane Conference’ na Orlando, Florida. Meta di e konferensia tabata pa prepará pa e temporada di orkan 2018 ku ta start promé di yüni próksimo i terminá 30 di novèmber.

Durante di e konferensia aki miembronan di ‘Rampenbestrijdingsorganisatie’ a sigui workshop di e.o. komunikashon promé, durante i despues di un orkan. Tambe tabatin workshop tokante kon ta evakuá hende for di un área di desaster i e ròl di brantwer durante un orkan. ‘Last but not least’ tabatin workshop tokante kon un ‘Emergency Operation Center’ tin ku funshoná durante un desaster. Un ‘Emergency Operation Center’ ta e lugá kaminda e kordinashon ta tuma lugá pa minimalisá e efektonan ku un kalamidat lo por tin riba komunidat.

Tur e preparashon aki ta pa mantené i sigui alsa e nivel di preparashon di e miembronan di ‘Rampenbestrijdingsorganisatie’. E tipo di konferensia, workshop i training nan aki a demostrá nan frutanan kaba durante entre otro e menasa di orkan Matthew na Kòrsou (2016) i resien den e ayudo duná durante pasahe di orkan Irma na St. Maarten (2017).

E maneho di Gobièrnu di Kòrsou ta pa dediká mas atenshon na prevenshon, preparashon i limitashon pa ku kualkier daño personal i material promé, durante i despues di kualkier krísis òf kalamidat ku por sosodé na Kòrsou. Esaki ta konta tambe pa riesgonan pa ku orkan.

Pa mas informashon bishitá http://www.kalamidat.cw òf Facebook:RisicobeheersingCuracao. Tambe por ‘download’ e app ‘Kalamidat’ kompletamente grátis den ‘App Store’ òf ‘Google Play’. Por último no lubidá ku den buki di telefòn tin informashon pa bo ta debidamente informá i pa ta prepará. Esakinan tur ta pa bo propio protekshon, bo famia, bo interesnan i bo bario.