Maneho Finansiero Deplorabel Medidanan pa saneá lo tin resultado Destrosá pa Ekonomia E Gobièrnu aki ta Kontra di Ekonomia, Kontra di Forsa laboral i Kontra di e Yu di Kòrsou

Maneho Finansiero Deplorabel

Medidanan pa saneá lo tin resultado Destrosá pa Ekonomia

E Gobièrnu aki ta Kontra di Ekonomia, Kontra di Forsa laboral i Kontra di e Yu di Kòrsou

 

Willemstad, – Minister di Finansa no ta mantené palabra ku lo no bini medida. Ademas e Minister di Finansa no por hiba un maneho finansiero responsabel. A konsekuensia di e situashon krea, e Gobièrnu kier introdusí medidanan pa subi su entrada ku lo kaba di strangula un ekonomia ku ya ta den krísis. No por konkluí nada otro ku e  gobièrnu aki ta kontra di un rekuperashon ekonómiko, kontra di e sektor laboral i hasta kontra di yu di Kòrsou.

 

Posishon personal tuma pa Minister di Finansa

Minister di Finansa Kenneth Gijsbertha ya na algun okashon a deklará ku e lo no bin ku ningun medida pa remediá e situashon di finansa públiko di pais. Minister a bai asina leu di deklará ku si akaso bini un “aanwijzing” for di Hulanda ku e lo tuma su retiro. Awe nos por konstatá ku Minister ta presentá un andanada di medida ku e intenshon pa drecha e finansa públiko, pero di otro banda esaki lo trese konsekuensianan desastroso pa e sektor laboral, pa ekonomia di pais i muy en partikular pa e yu di Kòrsou.

 

Estado di Finansa Públiko basá riba un Maneho Desastroso Hibá

Promé ku e Gobièrnu aktual a tuma asiento, un súrplus di 12 i 16 mion florin a ser registrá den añanan 2015 respektívamente 2016. Desde ku e Gobièrnu aki a tuma over, den añanan 2017 i 2018, e súrplus a kambia den un défisit kuantioso di 117 respektívamente 53 mion florin. Kontinuashon di e mesun maneho dor di e minister aktual lo a resultá den un défisit aun más grandi di 159 i 188 mion florin, manera a keda proyektá pa añanan 2020 respektívamente 2021. Pues klaramente un kambio den e maneho i/o esun responsabel ta rekerí inmediatamente.

 

Origen i Kousa di Défisit i Nesesidat pa bin ku más Medida

Despues ku den 2015 un kresementu chikí di ekonomia a wòrdu registrá di 0.3%, den 2016 i 2017, un kremp di -1.0% respektívamente -1.7% a wòrdu registrá. Den 2018 e kremp lo ta aun más grandi; pues por konkluí ku situashon ekonómiko na Kòrsou a empeorá ku e gobernashon akí. Un maneho fiskal stringente a wòrdu hiba prome i despues tambe, sin pone atenshon pa pone e ekonomia krese. Pa kolmo un maneho desastroso a wòrdu hiba último añanan kaminda “blunders” a wòrdu kometé dor di por ehèmpel finansiá Hòspital Nobo ku un 200 mion i Insel Air ku más ku 33 mion florin.

 

Pues den un situashon di krisis ekonómiko, ku un preshon riba e presupuesto públiko, desishonnan robes a wòrdu tumá. Anto pa nos futuro generashonnan, e Gobièrnu aktual a subi nos tasa di debe publiko (“debt ratio”), esta e debe públiko kompará ku nos produkto doméstiko bruto di 46% pa 50%. Pues, fia mas sèn, krea mas debe, dispidi sen den kos robes, subi defisit di presupuesto i hasi daño na nos ekonomia; “blunder” tras di “blunder”!

 

Komparashon ku Hulanda

Desde e di dos mitar di aña di 2013, Hulanda su ekonomia a bin ta krese konsistentemente. Despues di e krisis di krédito, Hulanda a bin ta konsentrá riba eksportashon, subida di konsumo i invershon i mas invershon. Mientras na Kòrsou nos a bin ta konsentrá riba medidanan pa kòrta i subi entrada di Gobièrnu dor di kobra mas impuesto i subi impuesto. Klaramente e falta di vishon i kapasidat pa pone ekonomia krese a hunga un rol importante den esaki. Di otro banda, mientras ku desempleo di Hulanda ta bahando (±3%), desempleo na Kòrsou  a subi di 11.7% bai te 14% di 2015 pa 2017. Den 2018, desempleo a baha masha tiki, pero esaki no ta pasó a krea mas kupo di trabou, pero pa motibu ku muchu mas hende a bandoná Kòrsou, rumbo pa Hulanda. Si di 2013 pa 2017, pues den 5 aña, a registrá un “migratiesaldo” (esaki ta e diferensia den e kantidat di hende ku ta bai i bin Hulanda for di i pa Kòrsou-) total di 2.411 persona. Den 2017 só, pues den solamente un aña, a registrá un “migratiesaldo” di kasi 2.000 hende. Pa 2018 e sifra akí lo ta mas haltu. Pues por konkluí ku e Gobièrnu akí ta kontra di ekonomia, kontra di e forsa laboral i kontra di e Yu di Kòrsou ku e ta kore ku n’e!

 

E Medidanan Proponé

Ta obvio ku Gobièrnu a skohe pa subi su entrada ku e medidanan proponé. Kòrtamentu di gastunan ta minimal. Resultado di esaki ta ku e medidanan lo afektá negativamente e ekonomia di Kòrsou aun más. No solamente Gobièrnu no ta bin ku un programa real ekonómiko pa flankea e doló ku e medidanan akí lo kousa ekonomia di e país, pero e ta hinka man ranka un pida mas di e bolo ekonómiko ku ta birando tur dia mas chikí! Por merkadeá “groeien en niet meer snijden” pero e aktonan i demas resultadonan ku ta keda atras ta minimal o hasta nihíl. Ademas no ta nuansá e medidanan ku un programa pa stimulá un rekuperashon ekonómiko. Por ehèmpel si bin ku un “sugar tax”, dikon no ta trese un eksepshon o krea un insentivo pa e empresanan chikí i/o e hòmber chikí ku ta traha o lora man ku produkshon di su kos di boka dushinan i stimulá pa nan eksportá esakinan. Ta falta di vishon i kapasidat atrobe ta trese e limitashon akí?

Ademas ta propone pa subi e tasa di OB. Pero no ta analisá o relatá esaki na nos situashon sosial real. Ultimo añanan nos “armoedegrens” a subi pa por ehempel un famia di un adulto ku dos yu di 1.966 pa 1.997 florin pa luna di 2016 pa respektivamente 2018. Mester ta obvio ku e medidanan lo enpobrese aun mas tantu e yu di tera den e situashon di krisis ekonomiko i fiskal aki, mientras Gobièrnu ta keda ignorá e grupo aki dor di no flankea su medidanan ku un programa sosial.

Tambe ta hasi komparashon ku Aruba pa hustifiká subida di “accijns”. Pero no ta bisa ku e volumen di benta i konsumo ta muchu mas haltu na Aruba i dor di esaki ku e tasa mas haltu lo por wòrdu kompensá. Di otro banda no ta kompará nos ku St. Maarten kaminda no tin ni “accijns” ni impuesto di entrada pa ni alkohol ni sigaria.

 

Obviamente esaki lo afekta nos nivel kompetitivo espesialmente pa e uniko sektor ekonómiko ku ta kresiendo ku ta turismo. Pues un biaha mas, e Gobièrnu aktual ta kontra di un rekuperashon ekonomiko di nos pais.

 

Konklushon: E Gobièrnu akí ta

Kontra di Ekonomia, Kontra di Forsa Laboral i Kontra di e Yu di Kòrsou

Partido Nashonal di Pueblo no por konkluí nada otro ku tin un falta di vishon, interés i ignoransia di e Gobièrnu akí pa realisá un rekuperashon ekonómiko di Kòrsou. Medidanan ku wòrdu tumá ta pa Gobièrnu keda bon mirá serka CFT i Hulanda. Pero niun “medida” realmente ta wòrdu tuma pa stimulá un rekuperashon te pa por realisá un kresementu ekonómiko pa Kòrsou.

Desde ku e Gobièrnu akí a yega na mando, ta solamente más i más establesimentu a haña na mes obligá ta sera nan portanan, pasó nan no por sobrebibí mas den e situashon ekonómiko di krisis akí, mientra ku e preshon fiskal riba nan no por wordu karga mas. Pues ku otro palabra, e Gobièrnu akí a manda muchu mas hende kas i/o laga nan desemplea. E Gobièrnu akí ta kontra di e forsa Laboral.

Si ya kaba muchu mas hende a bandoná Kòrsou rumbo pa Hulanda pasó nan no ta mira un futuro mas pa nan aki, PNP ta premirá un huida di muchu mas yu di tera despues ku skol sera na jüni, rumbo pa Hulanda, debí na falta di perspektiva den nan propio país. Ku hopi duele PNP tin ku konkluí ku e Gobièrnu aki a krea un “Economische Boel “ i ta kontra di su propio Yu di Kòrsou.

avatars-000246785885-n1b58h-t500x500

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: