Fundashon Kas Popular no ta un instansia filantrópiko

Fundashon Kas Popular no ta un instansia filantrópiko

 

Fundashon Kas Popular na luna di yüni 2018 tabata forma un riesgo pa presupuesto 2018. Den un investigashon di e kolegio di supervishon finansiero, Cft, a resultá ku Gobièrnu debe FKP 250 mion florin.

Sinembargo den e reunion di 11 di mart último kaminda minister Gijsbertha a presentá situashon finansiero di Kòrsou, minister a komuniká ku e debe di Gobièrnu na FKP ta 13 mion florin.

Kon mester komprondé esaki anto?

FKP un fundashon ku meta prinsipal konstrukshon di Kas pa pueblo por disidí riba su mes pa laga e debe aki di 250 mion florin kai miéntras tin un lista di espera di 8000 persona.

Si nos hasi dis un kalkulo di 125.000 florin pa un kas, e suma di 250 mion por a konstruí 2000 kas pa pueblo.

Ku ki outoridat FKP ta tuma e desishon pa laga e debe aki kai?

Te ainda no tin kuentanan anual di 2015, 2016 i 2017.

Sin e akto karikativo aki di FKP e défisit di presupuesto 2019 lo no ta 126.8 mion florin pero 376.8 mion florin.

Pa yuda sera buraku di presupuesto 2019, pueblo atrobe mester keda sin bibienda i riba dje entrante luna di yüli ta bini ku mas medida riba e pueblo vulnerabel aki.

Dia 13 di sèptèmber 2018 frakshonnan di oposishon a yama un reunion públiko ku a keda yamá di 15 di novèmber i a keda di schors te awe.

Esaki ta un di e maneranan pa “bleed” Gobièrnu i malgastá plaka di pueblo.

Ta bini ku medida riba e pueblo pa kompensá mal gobernashon di Gobièrnu.

Pa nos finansas ta na òrdu gobernantenan ta promé ku mester kai bou di medida.

Movementu Progresivo

Marilyn Moses