Plataforma di derechinan di mucha (Plataforma IVRK) Kòrsou ta konsientisá mucha tokante Derechinan di Mucha pa medio di arte
Plataforma di derechinan di mucha (Plataforma IVRK) Kòrsou ta konsientisá mucha tokante Derechinan di Mucha pa medio di arte
Geplaatst op 21 Mart 2019 dor di Ministerio di Desaroyo Sosial, Labor i Bienestar
Willemstad – Plataforma IVRK ta organisá, den kuadro di algun di e artikulonan di e Tratado Internashonal tokante Derechi di Mucha, un seri di workshop pa mucha. E workshopnan aki ta forma parti di e plan di akshon di e grupo di trabou enkargá ku enbolbimentu di hóbennan den e Tratado Internashonal di Derchinan di Mucha. E proyekto “Speel Zing Dans”, ta un proyekto ku tin komo meta pa hasi mucha, hóben i adulto konsiente di e derechinan di mucha, pa medio di un workshop mediante ekspreshon arístiko den forma di baile, kanto i aktuashon.
“Speel Zing Dans” ta un esfuerso konhunto entre Ministerio di Desaroyo Soshal, Labor i Bienestar, Fundashon Bos di Hubentut, Lot’s Foundation i Harlekijn Holland. E artíkulonan ku ta trata den e workshop ta: art. #12: partisipashon; art. #13: duna opinion; art. # 28: enseñansa; art. #31: wega i tempu liber, art. #42: konsientisashon tokante e tratado.
Den kuadro di esaki lo tin un kantidat di 5 workshop na 5 skol, alkansando un kantidat di mas o ménos 350 mucha. E workshopnan na skol ta kuminsá 7:30 or i ta terminá 12.30 or. E workshopnan aki ta aksesibel únikamente pa e muchanan di e skolnan en kuestion.
Alabes, lo tin un show interaktivo pa públiko en general. Esaki ta tuma lugá na Sambil djasabra 23 di mart di 5’or di atardi pa 7’or di anochi. Públiko por spera un atardi durante kua nan por partisipá aktivamente na e presentashon di kanto i baile. Tur edat por partisipá na e atardi aki, pero e ta speshalmente interesante pa muchanan di skol di fundeshi.
“Speel Zing Dans” ta un produkshon di Lot’s foundation, un fundashon ku ta traha sin spar esfuerso pa konsientisá hóbennan tokante e derechinan di mucha na un manera kreativo. E produkshon ta konsistí di kanto, wega i baile. Koreografia di e produkshon aki ta na enkargo di Faizah Grootens, un koreógrafo, bailarin Yu di Kòrsou ku eksperensia Internashonal. E otro bailarin/aktornan ta Hani Andary, Annerie van Loenen i Quincy Ignacia. Komposishon di músika ta di Herman van Veen kende ta un konosí den e mundu di teater na Hulanda.
Un i tur ta keda invitá pa presensiá i partisipá na e show aki. Entrada ta grátis.
Pa mas informashon por yama 434 0451 òf 516 30 12. Tambe por komuniká via Facebook (Plataforma IVRK).
