Minister Glenbert Croes: Aruba ta eternamente agradecido na tur e Soeurnan cu a yuda nos Pueblo durante cu nan a biba aki

Minister Glenbert Croes:
Aruba ta eternamente agradecido na tur e Soeurnan cu a yuda nos Pueblo durante cu nan a biba aki

Durante su bishita di trabou na Hulanda, Minister Glenbert Croes den su buskeda pa por haya e miho manera con pa soluciona e problemanan social na Aruba, a bay bek den e Aruba di antes unda cu nos tabata conta cu presencia di Soeurnan masha activo den enseñansa, cuido, deporte y formacion. Y si bo bay bek n’e tempo aya nos tabata un Pueblo cordial, cu tabatin convivencia y compasion cu nos prohimo.

Minister Glenbert Croes a dicidi di bay bishita e Soeurnan pa personalmente gradici nan pa tur locual cu nan a haci pa nos Pueblo. Na mes momento a busca guia cerca Soeur Helene, Soeur Lenie y Soeur Gemma kendenan tabata mas cu dispuesto pa comparti nan experiencia cu e mandatario. En todo caso e bendicion di nan oracion lo compaña nos riba nos mision.

Tabata pa e mandatario un experiencia hopi special di por tabata para na e graf di Soeur Imelda, e Soeur cu a funda Imeldahof.

Cu hopi gratitud, Minister Glenbert Croes a bishita e luga unda Soeur Jose ta dera, kende a traha na Te Aworo y a cuid’e na aña 1966.

“Awe mi a bai Haelen, Limburg pa gradici den nomber di nos Pais, na honor di tur e Soeurnan cu a yuda nos muchanan, nos famianan, nos Pueblo den añanan ‘50, ‘60 , 70, ‘80 y ‘90 na Aruba. Riba e potret mi ta hunto cu Zuster Gemma, Zuster Lenie y Zuster Helene na kendenan tambe mi a regala un potret di Zuster José kende a cuida mi na 1966. Mi a expresa na nan cu nos deseo ta pa nan bolbe Aruba pa asina Aruba siña conoce nan storia y cu Dios mediante nan historia por ripiti pa nos logra pa Aruba y tur nos yiunan un futuro social nobo usando nan ehempel como inspiracion pa nos mayornan di awe y como inspiracion pa nos tur, pa nos por sigui nan ehempel di FE, AMOR DEDICACION y SERVICIO den atende cu tur e problemanan social cu na Aruba nos ta bibando. Mi a duna nan na honor di tur e Zusternan cu a bin Aruba y e Zusternan di Aruba un GRAN DANKI den nomber di un Pueblo eternamente agradecido”, e mandatario a expresa.

Riba portada un recorido di Croes su bishita.

23 maart 2019