PIN: awor ta ora pa un ‘Pakto pa Kambio’

Estado, empresario i trahadó mester duna i tuma pa los nos ekonomia

 

Willemstad — Segun Partido PIN, un pakto entre trahadó, empresario, organisashonnan no gubernamental (NGO’s) i estado ta inevitabel si Kòrsou ke rekupera e mas di 250 mion florin ku su ekonomia a perde for di aña 2015. Un pakto asina lo tin ku ensera un kombinashon di medida i redukshon di gastu di parti di gobiernu, mas sosten sosial n’e famianan mas vulnerabel, kambionan struktural na nos ekonomia, mas invershon i tambe un akuerdo den reino pa mas espasio riba presupuesto i rekuperashon di difisitnan anterior plamá riba mas aña.

Konteksto

Ya ta obvio ku nos situashon no ta simplemente un kuestion di defisit riba presupuesto, pero mas bien un problema di kontrakshon ekonomiko konstante i e falta di boluntat pa hasi e kambionan struktural pa nos ekonomia ta den miho posishon pa kuminsa krese di forma duradero. E kambionan ei ta ainda mas nesesario den bista di e influensha internashonal riba nos. Den sentido negativo por pensa riba e situashon na Venezuela i di nos refineria, i tambe e terminashon di areglonan di off shore. Den sentido positivo sinembargo mester pensa riba e oportunidatnan di oro ku turismo i logistika ta brinda si nos hasi e kambionan struktural pa nos pais ta mas kompetitivo.

Pa suavisa e peso di kambio, awor i mesora mester formalisa programanan di sosten sosial direktamente dirigi riba e famia- i personanan mas vulnerabel di nos komunidat.

Impulso ekonomiko

Partido PIN ta kompronde ku mester baha gastu i subi entrada di gobiernu paso simplemente gobiernu no por sigi gasta mas ku e ta risibi. Esei ta kontra futuro generashonnan, kontra lei di pais i kontra rijkswet Cft. Pero referiendo n’e base di tur ekonomia, alabes PIN ta propone pa impulsa ekonomia stimulando e faktornan merkado laboral i merkado di kapital fuertemente.

Enkuanto labor ya ta konosi ku PIN ta na fabor di fleksibilisashon parsial. Kiermen fleksibilisashon solamente pa kontraktnan di futuro i esei kombina ku benifisionan adishonal pa esnan bou di e struktura fleksibel. Asina ta mas fasil pa tuma hende nobo na trabou. Seguridat di trabou mester bira seguridat di un trabou.

Enkuanto merkado di kapital: konsiderando e sobre likides di instututonan finansiero, PIN ta propone un insentivo pa stimula deposito di un parti dje plakanan ei den un of mas fondo grandi di invershon lokal. E fondonan aki na nan turno lo por gosa di benefisionan fiskal signifikante. Asina lo por logra krea e tan nesesario merkado di kapital fleksibel i fondonan di invershon agresivo, ku un magnitut sufisiente grandi pa realisa invershon impaktante den nos ekonomia.

Sosten sosial

E Pakto pa Kambio mester ensera sosten sosial. No pa tur hende, pero dirigi riba e persona-, famia- i barionan mas vulnerabel. Den un komunikado anterior ya PIN a papia di ampia e makutu basiko ku mas fruta i berdura i adishon di diferente alimento. Desember ultimo, riba proposishon di Partido PIN, ‘wall-to-wall’ parlamento a aproba un moshon di PIN urgiendo e minister di SOAW pa hasi lo nesesario pa entrante 2020 introdusi supsidio di hür pa kasnan partikular dirigi riba mayornan soltero ku entrada abou.

Adishonalmente Partido PIN ta sugeri pa hasi e sigientenan topiko di diskushon pa yega na un Pakto pa Kambio: 1) re-introdukshon di kuminda na skol, 2) establesementu di komedor sosial den barionan vulnerabel, 3) karchi di rebaho riba tarifa di bus i 4) mas kupo di ‘kinderopvang’, kresh i programanan despues di skol supsidiá.

Palabrashon den Reino

En bista di problemanan sosial, e golpinan ekonomiko eksterno i gravedat di e defisit presupuestario mester yega ademas na palabrashonnan na nivel politiko den Reino. Arma ku un Pakto pa Kambio i un plan sosial-ekonomiko-fiskal ku ta gosa di sosten general, dirigi riba kresementu ekonomiko, atendementu di presupuesto i sosten sosial, Partido PIN ta sigur ku lo logra palabrá ku Hulanda pa plama rekuperashon di defisitnan anterior riba mas aña, i permiti fiansa pa kubri invershon i gastunan di gobiernu.

Partido PIN ta invita tur aktor sosial pa warda e diskushon riba ken tin falta pa despues, i awor aki konsentra tur energia riba sera un Pakto pa Kambio i renobashon di nos pais, teneniendo kuenta ku esnan mas vulnerabel.