E di 7 edishon di Koningsspelen ta tuma lugá djabièrnè 12 di aprel próksimo Tema pa e aña aki ta: BEBE HOPI AWA!

E di 7 edishon di Koningsspelen ta tuma lugá djabièrnè 12 di aprel próksimo
Tema pa e aña aki ta: BEBE HOPI AWA!

E tema di Weganan di Rei e aña aki, ku ta tuma lugá dia 12 di aprel próksimo, ta ‘Bebe hopi Awa’. Durante di e dia deportivo lo entusiasmá tur mucha pa bebe awa. E palabranan HA-TWEE-GO (H20, símbolo di awa) ta para sentral. Awa ta hasi muchanan fuerte, sabí i lihé i kombertí nan den e mihó ehemplar di nan mes. Awa ta saludabel, ta sòru pa energia i ademas ta e bibida perfekto, sali direktamente for di kranchi, pa kita set. E dia deportivo ta wòrdu organisá pa alumnonan di skol di fundeshi den henter Reino Hulandes. Aña pasa mas ku 17 mil mucha a tuma parti na e Weganan di Rei na Kòrsou. E weganan ta un inisiativa di e komishon organisadó di e inougurashon di Rei Willem Alexander na aprel 2013. For di e tempu ei, e dia deportivo ta regresá tur aña di nobo. E weganan aktivo i deportivo tin komo meta pa konsientisá tur mucha, ku un desayuno salu i moveshon ta importante i ta ala bes hopi dushi. Ku e Weganan di Rei e organisashon kièr kontribuí na un komunidat uni, salú i deportivo.

Apertura ofisial:
E apertura ofisial un biaha mas ta den man di su ekselensia gobernador di Kòrsou, señora Lucille George Wout i lo tuma lugá na dos diferente skol. Promé na kolegio Maria Auxilliadora na Santa Maria i despues na Schroederschool na Julianadorp. E Weganan di Rei ta konsistí di un desayuno i un dia deportivo yena ku moveshon. I e dia spesial aki a ser krea pa konsientisá mucha i nan mayornan ku un desayuno balansa i salú kombiná ku hopi moveshon ta esensial pa nan desaroyo. E konstelashon di e desayuno di Rei, ta enserá produktonan balansa i dushi, ku ta brinda e muchanan energia i ademas ta pas perfekto ku e dia festivo. E aña aki e organisashon lo sòru un biaha mas pa tur mucha risibí un desayuno grátis, danki naturalmente na kontribushon di patrosinadónan manera entre otro: Reda Sosial, Curaçao Wegenbouw Maatschappij, Refineria di Kòrsou en Corendon Hotels en Resorts. Ademas di esei tambe tur skol lo risibí material di deporte i kosnan di hunga pa e alumnonan.
Mas ku 50 skol un biaha mas a inskribí nan alumnonan pa tuma parti na e Weganan di Rei e aña aki i kada skol ta liber pa duna kontenido na e dia deportivo. Ku e Weganan di Rei, nos kièr enfatisá ku moveshon pa maske ta un ora tur dia, ta importante pa tene e kurpa salu. E proyekto tur aña di nobo ta ser organisá i koordiná pa Mavis Albertina, kende tambe a forma parti di e komishon organisadó di e inougurashon di Rei Willem Alexander na 2013. I ta hasi esaki den estrecho kooperashon ku Fundashon Fudsek i Nos Pais Television. Huntu ku tur skol e ekipo organisadó ta spera di bolbé krea un dia deportivo festivo pa tur mucha di skol básiko.
Saludo kaluroso,
Mavis Albertina
Koordinadó ‘Koningspelen Caribisch Koninkrijk’

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: