MCB sosio di Fundashon Bon Intenshon pa proyektonan konstruktivo pa Kòrsou

MCB sosio di Fundashon Bon Intenshon pa proyektonan konstruktivo pa Kòrsou

 

WILLEMSTAD – Despues ku durante basta aña nan a traha estrechamentu ku otro kaba, Maduro & Curiel’s Bank (MCB) a disidí awor pa bira sosio di Fundashon Bon Intenshon (FBI) den e diferente proyektonan positivo ku nan ta realisá pa años kaba. MCB su direktor Chicu Capriles i FBI su presidente Gregory Elias a seya esaki ku un firme duná di man.

 

Den kuadro di e afán di MCB pa pone mas atenshon na e diversidat di desaroyonan positivo pa Kòrsou, e aña aki Banko a disidí pa profundisá su relashon ku e fundashon di señor Elias poko mas. Esei ta konta spesialmente pa e proyektonan konkreto ku kada be ta bini bèk i ku semper ta asina eksitoso, manera pa e aña aki atrobe Curaçao International Film Festival Rotterdam (10-14 di aprel awor), Curaçao International BlueSeas Festival (19 & 20 di aprel awor), festival di Pueblo (2 di yüli awor) ku un karakter lokal fuerte, e mas legendario Curaçao North Sea Jazz Festival (27-29 di ougùstùs awor) i Kaya Kaya (ougùstùs i desèmber). Kada un di e eventonan di klase aki ta halsa reputashon di Kòrsou i ta nifiká un kontribushon balioso na ekonomia, na turismo en partikular, pa no lubidá ku e ta duna nos komunidat lokal un oportunidat úniko pa tuma nota di un variedat na ekspreshonnan kultural interesante i hopi be inovativo di fama internashonal.

Aña aden, aña afó e fundashon FBI a demostrá kaba ku e ta kapas pa logra un organisashon ku te den eksterior ta krea atmirashon. P’esei ta asina rekomendabel pa bèrdaderamente sostené e fundashon i asina duna un man pa kontinuidat di tur esaki. E ta kuadra ademas den MCB su puntonan di salida di maneho di “good corporate governance”  i nan responsabilidat sosial, pa duna un kontribushon importante na esaki.

Komo partner ofisial di FBI, rondó di diferente di e eventonan MCB lo duna atenshon spesial na e inisiativanan balioso aki. Klientenan di e Banko sigur tambe lo por probechá di esaki. Ademas, na e eventonan MCB lo ta visiblemente presente komo partner.

 

Curaçao, 26 di mart 2019