HNO, e realidatnan segun liña di tempu for di 19 desèmber 2013.

HNO, e realidatnan segun liña di tempu for di 19 desèmber 2013.

Parlamentario Curtley Obispo durante e reunion di Parlamento di Kòrsou di dia 26 mart 2019 a para ketu na un par di realidat pa loke ta e proyekto di konstrukshon i transishon Hospital Nobo Otrabanda (HNO). Un realidat ta ku Pais Kòrsou no a bira un Pais outónomo den Reino Hulandes riba 29 mei 2017. Tin e realidat ku konstrukshon di Hospital Nobo Otrabanda no a kuminsá riba 29 di mei 2017. E aktual Gobièrnu di Kòrsou no a start ku konstrukshon di Hospital Nobo Otrabanda. E realidat ta ku konstrukshon di Hospital Nobo Otrabanda a kuminsá riba un djaweps 19 desèmber 2013 ku e seremonia di “Ground Breaking” na Hamelbergweg. Banda di mustra e realidatnan, tambe ta bon pa mustra riba echonan.  P’esei tambe e la mustra e liña di tempu pa ku konstrukshon di Hospital Nobo Otrabanda: (a) Awe 26 mart 2019 ta 1,923 dia for di 19 desèmber 2013. (b) 1,256 dia konstrukshon bou di tur e Gobièrnunan anterior i (c) 667 dia di konstrukshon bou di e Gobièrnu di Kòrsou aktual ku ta gobernando for di 29 mei 2017. Ta e Gobièrnu aktual den 667 dia ta trahando i ta sigui traha duru riba solushonnan pa e herensia di bòshi i tròshi di retonan i problemanan pa loke ta Hospital Nobo Otrabanda. E Gobièrnu di Kòrsou aki tin e responsabilidat di sigui atendé i sigui resolvé e retonan aki na bienestar i progreso di nos Pais Kòrsou. Pa asina Sentro Médiko Kòrsou (Curaçao Medical Center) bira operashonal i un realidat den aña 2019.

Parlamentario Curtley Obispo tambe a mustra riba entre otro e siguiente realidat di echonan durante e periodo di 19 desèmber 2013 te ku 28 mei 2017, kual ta entre otro: (1) nunka te ku awe, Gobièrnunan anterior no a duna Parlamento di Kòrsou, kuenta i rason ku kuentanan anual audita di e proyekto Hospital Nobo Otrabanda over di añanan 2013 te ku 2015. Kual tambe a kousa stagnashon pa loke ta trata e kuentanan anual audita di aña 2016 i 2017, (2) mayoria gastunan adishonal (meerwerk) kalkulá di 200 mion florin tin di haber ku e periodo aki i Gobièrnunan anterior, (3) SONA durante e periodo aki nunka a entrega segun kontrakt,  kuenta i rason na tempu na e Gobièrnunan anterior. No a entrega na tempu e kuentanan anual audita (jaarrekening) 2013 te ku 2015 i (4) nunka den e periodo aki Gobièrnunan anterior no a duna na tempu Parlamento di Kòrsou kuenta i rason di uso di e fondonan ku a fia pa ku e proyekto di konstrukshon i transishon Hospital Nobo Otrabanda. Segun artíkulo 87 insiso 5 di Areglo di Estado di Kòrsou, Gobièrnunan anterior no a duna kuenta i rason na tempu a base di kuenta nan anual 2013 te 2015 audita di Pais Kòrsou dor di SOAB i Kontrolaria General. Kual tambe a kousa tambe stagnashon pa loke ta trata kuentanan anual audita di aña 2016 i 2017.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: