Cft ta konsehá Konseho di Minister di Reino pa duna Kòrsou un  instrukshon

Cft ta konsehá Konseho di Minister di Reino pa duna Kòrsou un  instrukshon

Willemstad – Awe, djaluna 1 di aprel 2019, Kolegio di supervishon finansiero (Cft) a konsehá Konseho di Minister di Reino pa duna Kòrsou un instrukshon pa balansá e gastunan i entradanan pa mas aña den e presupuesto.

E entradanan i gastunan di pais Kòrsou no ta den balansa i e maneho finansiero no ta na òrdu. E aña presupuesatario 2017 a sera ku un défisit di ANG 116,8 mion i e défisit preliminar di 2018 ta ANG 52,7 mion. Ya for di 2016 Cft ta vosiferando su preokupashon tokante e situashon finansiero di Kòrsou. Den e kuadro aki Cft ta señalá kalkulashonnan muchu optimista di entrada, defisiensia den e maneho finansiero i falta di disiplina presupuestario, ku ta pone ku e gastunan no ta keda denter di e límitenan di e presupuesto.

E presupuesto di 2019 tambe ta menasá di tin un défisit (supstansial) di e biaha aki aproksimádamente ANG 100 mion. Apesar di algun medida signifikante ku Kòrsou ke introdusí entrante 1 di yüli próksimo, pa di tres aña konsekutivo lo no kumpli ku e norma preskribí pa lei di un servisio komun balansá. Mester di mas ku e medidanan anunsiá pa trese ekilibrio entre e entradanan i gastunan di pais. Meser kambia e rumbo.

Cft ta konsiente ku e tarea pa Kòrsou ta konsiderabel, sinembargo reforma struktural ta inevitabel. Reforma struktural ta nesesario pa sigurá kontinuidat di e fondonan di seguridat sosial kolektivo i pa krea espasio nesesario pa entrante otro aña kompensá e défisitnan aki i pa yega na invershon adishonal den entre otro enseñansa i edukashon. Si permití e défisitnan oumentá, esaki lo por nifiká ku e debe di gobièrnu ta sigui oumentá i lo keda tranesferí pa e siguiente generashonnan.

Fortifikashon di ekonomia di Kòrsou ta rekerí prinsipalmente invershon privá. Un kondishon básiko ku ta nesesario pa esaki ta un maneho sólido i duradero di finansa públiko. Invershonistanan ke limitá nan riesgonan i nan ke por konfia riba stabilidat i kalidat di e aparato gubernamental i atministrativo. Riba e tereno aki tambe den e próksimo añanan aki lo mester bini mehorashon.

Konsiderando tur esaki Cft a tuma e desishon di konsehá e Konseho di Minister di Reino pa duna gobièrnu di Kòrsou un instrukshon. Ta keda na Konseho di Minister di Reino pa disidí si e ta duna un instrukshon, i si esei ta e kaso, kiko eksakto esaki su kontenido lo ta. Promé ku duna e instrukshon, lo brinda gobièrnu di Kòrsou e oportunidat pa e presentá su vishon.

Ku drentamentu na vigor di e relashonnan estatal nobo riba 10 di òktober 2010, i ku sanamentu di e debe di parti di Hulanda, Kòrsou, Sint Maarten i Hulanda a akordá pa regulá supervishon finansiero pa medio di un lei di Reino. Supervishon finansiero ta keda ehekutá pa Konseho di Minister di Reino, miéntras e Kolegio di supervishon finansiero tin un ròl di señalá i konsehá. E meta di e Lei di Reino di supervishon finansiero ta pa pone i mantené òrdu den e atministrashon finansiero, pa evitá problema finansiero nobo i pa realisá finansa públiko sostenibel.