Minister Koeiman ta hasi un yamada pa nos tin un agènda na bienestar general Den su diskurso despues di e Santu Sakrifisio di Misa invitá pa CGTC i SKS riba Dia di Labor

Minister Koeiman ta hasi un yamada pa nos tin un agènda na bienestar general

Den su diskurso despues di e Santu Sakrifisio di Misa invitá pa CGTC i SKS riba Dia di Labor

Willemstad – Durante su diskurso despues di Santu Sakrifisio di Misa na okashon di Dia di Labor na Misa di Santa Famia, Minister Hensley Koeiman a hasi un yamada na komunidat pa nos tur tin un agènda enfoká riba bienestar general. Un agènda ku ta dirigí riba progeso i adelanto di tur siudadano di País Kòrsou.

“Mi ta konvensí ku nos por logra e progreso ei, pero unión i positivismo mester prevalesé den tur nos akshonnan,” e titular responsabel pa Desaroyo Sosial, Labor i Bienestar a bisa. “Nos país ta pasando den retonan ku ta rekerí atenshon pa huntu nos traha pa yega na solushonnan duradero. Kulpando otro nos lo no logra. Esei lo traha kontra-produktivo. Historia a mustra ku divishon nunka no a trese solushon.”

Minister Koeiman a bai bèk den historia pa tira lus riba e lucha ku lidernan sindikal a hiba pa trahadó por a traha oranan di trabou humano, pa risibí pago hustu pa nan labor, den un ambiente sano. “Nan tambe tabatin retonan grandi nan dilanti pero tabatin un vishon pa lucha huntu pa yega realisá e metanan ku nan a stipulá.”

“Mundu di trabou ta kabiando rònt mundu i nos tambe ta sinti e efektonan. Konsiente di esei gobièrnu, huntu ku representashon di dunadónan di trabou i di mundo sindikal ta traha riba un Instituto Nashonal pa prepará nos ‘workforce’ pa por ta prepará pa kambionan. Tin oportunidatnan nobo ku nos mester ta prepará p’e.”

Mas aleu Minister Koeiman a bisa ku ta hasiendo todo por todo pa nos mantené nos refinería. Sea  konvensí ku nos lo no spar ningun esfuerso pa nos refinería sigui operá bou di kondishonnan di mas salú posibel.

Por último Minister Koeiman a mustra riba e desaroyonan positivo i posibilidatnan ku nos industria di turismo ta duna muestra di por ofresé.

“E retonan ta grandi, pero meskos e oportunidatnan. Nos mester uni kada talento, konosementu, eksperensia i boluntat pa huntu nos saka nos País pa dilanti. Esei mester bira E meta komun.”

This site uses Akismet to reduce spam. Learn how your comment data is processed.

error: Content is protected !!
%d bloggers like this: