WILLEMSTAD – Gobièrnu di Kòrsou a tuma nota di e konseho di Kolegio di Supervishon Finansiero, esta College Financieel Toezicht (CFT), di 1 di aprel, den kua nan ta konsehá Konseho di Minister di Reino (RMR) pa tuma un desishon pa duna Kòrsou instrukshon enkuanto e presupuesto di 2019.

Gobièrnu ta kompletamente konsiente di e retonan finansiero serio ku Kòrsou ta konfrontá kuné i ya a tuma diferente paso pa bai implementá un seri di reforme struktural i tambe realokashon pa yega na bahamentu di gastunan i subida di entrada. Esakinan ta tópiko di konsiderashon i toma di desishon den konsulta ku stakeholders i partnernan sosial.

Banda di esaki, 27 di mart último Gobièrnu di Kòrsou a manda un karta pa Promé Minister Rutte, den su funshon komo presidente di RMR, kaminda ta hasi un apelashon riba artíkulo 25 di Lei di Supervishon Finansiero di Reino. E artíkulo akí ta brinda e posibilidat pa desviá di e normanan presupuestario manera ta fihá den Lei di Reino ku konsentimentu di Konseho di Minister di Reino.

Gobièrnu ta indiká den e karta ku de echo tin kuestion di retonan grandi di vários aña pa ku e presupuesto, pero ku entretantu ta hopi bisto tambe ku ta trata aki di insidentenan ekstraordinario ku ta afektando nos ekonomia, presupuesto i komunidat grandemente. Den e karta Gobièrnu ta bisa entreotro ku e impakto di e krísis ekonómiko i e inseguridatnan polítiko aktual di Venezuela riba ekonomia di Kòrsou, ta hopi grandi. E ta afektá direktamente i indirektamente mas ku 25% di ekonomia di Kòrsou, ku ya tin años ta pasando dor di un reseshon. E ta afektá hopi negoshi i personal i nan seguridat sosial, esta di bida i entrada. E efektonan eksterno akí ta asina fuerte, ku ta nesesario pa hasi un apelashon riba e artíkulo di eksepshon di Lei di Reino intenshoná pa esaki. Meta ta pa banda di implementashon di reformenan struktural, redukshon di gastunan i oumentashon di entrada, laga espasio tambe pa hasi invershonnan nesesario urgente pa logra un rumbo nobo duradero pa Kòrsou, ku atenshon pa e nesesidatnan sosial di komunidat.

CFT ta indiká ku ta keda na RMR pa disidí si realmente lo bin ku instrukshon, i si esei ta e kaso, kiko ta kontenido presisamente di esaki. Promé ku bin ku instrukshon lo duna gobernashon di Kòrsou e oportunidat pa duna su persepshon riba esaki. Gobièrnu di Kòrsou lo hasi uso di e oportunidat akí pa, komo komplemento na e karta ku resien a entregá na Promé Minister Rutte, enfatisá ku Gobièrnu, di forma finansieramente responsabel, ke yega na un kambio sosio-ekonómiko duradero pa Kòrsou.