WILLEMSTAD – Gobièrnu di Kòrsou a tuma nota di e konseho di Kolegio di Supervishon Finansiero, esta College Financieel Toezicht (CFT), den kua nan ta konsehá Konseho di Minister di Reino pa tuma un desishon pa duna Kòrsou instrukshon enkuanto e presupuesto di 2019. CFT ya a duna di konosé anteriormente ku e presupuesto no ta kumpli ku e normanan segun Lei Finansiero di Reino.

Dia 27 di mart último Gobièrnu di Kòrsou a manda un karta pa Promé Minister Rutte, den su funshon komo presidente di RMR, kaminda ta hasi un apelashon riba artíkulo 25 di Lei di Supervishon Finansiero di Reino. E artíkulo akí ta brinda e posibilidat pa desviá di e normanan presupuestario manera ta fihá den Lei di Reino ku konsentimentu di Konseho di Minister di Reino. Gobièrnu ta indiká den e karta ku ta trata aki di insidentenan ekstraordinario ku a afektá nos ekonomia, presupuesto i komunidat grandemente. E insidentenan akí a afektá Kòrsou asina tantu ku ta nesesario pa hasi un apelashon riba e artíkulo di eksepshon di Lei di Reino intenshoná pa esaki.

CFT ta indiká ku ta keda na RMR pa disidí si realmente lo bin ku instrukshon, i si esei ta e kaso, kiko ta kontenido presisamente di esaki. Promé ku bin ku instrukshon lo duna gobernashon di Kòrsou e oportunidat pa duna su persepshon riba esaki. Gobièrnu di Kòrsou lo hasi uso di e oportunidat akí komo komplemento na e karta ku resien a entregá na Promé Minister Rutte.