Dia 1 di yüni próksimo na Landhuis Brievengat Di tres edishon di Jazz Meets Cultures ku un ‘line up’ impreshonante

Dia 1 di yüni próksimo na Landhuis Brievengat

Di tres edishon di Jazz Meets Cultures ku un ‘line up’ impreshonante

 

Jazz Meets Cultures ya no ta un nòmber deskonosí; ta trata aki di un konsepto úniko ku nos komunidat a brasa kaminda tin un fushon entre e músika Jazz i diferente género musikal. E konsepto aki ta keda tresé dilanti den forma di un konsierto ku e meta pa rekoudá fondo pa por yuda nos hóbennan ku desaroyo di nan talento den músika i baile, di kua danki na tur ku a aportá aña pasá, ya tin un grup di hoben siguiendo lès di músika serka sr. Dennis Aalse.

Ayera djaluna 1 di aprel, Fundashon Jazz Meets Cultures a tene un konferensha di prensa na Landhuis Brievengat, den kua a duna informashon di e di tres edishon di Jazz Meets Cultures, kua lo tuma lugá djasabra 1 di yüni próksimo na Landhuis Brievengat di 8or pa 11or di anochi.

Durante di e evento aki a hiba palabra presidente di e fundashon, sra. Denise Mathilda-Priest, sr. Dennis Aalse kende e aña aki tambe tin e parti musikal na su enkargo, srta. Riggwenda Doorjé komo representante di e grupo di artistanan partisipante i tambe Eduarda de Bies kende lo ta enkargá ku e parti di baile. Banda di nan, a hiba palabra mas ku klaro 3 di e patrosinadónan di JMC, den persona di sra. Janine de Windt di CTB, Courtney Silië di Licores Maduro i tambe Jimmy Loanjoe di Massive. E persona ku mas a hala atenshon, tabata e hoben Bre-Shaina Ruiz, kende ta un di e hobennan ku ya ta bayendo lès di músika, kontando su eksperensia.

Músika

E aña aki Jazz Meets Cultures ta konta ku un ‘line up’ impreshonante di artista: Serapio Pinedo ku su Ka’i Orgel den kuadro di aña di Ka’i Orgel, Maarten Schakel, Miguel Gustino, Gilmar Fraitas, Yumaira Grijt, Riggwend Doorjé, Anairia Nivillac, Remy Joss, Jarnise Aitatus, nos kantadó mayó 2019 Adjatay Denisia, Rich Pieter, Chaika, Menasa, Junior Tecla, Url Isenia, Harlianne Brazil, Naomi Silvanie, Curayubata, Reinier Lijfrock, Mistica Stefania, frònt di Icons konsistiendo di Hunneley Felicia, Steven Daniel, Amos Balentien i Djuric Virginie, Farley Lourens, Ray Lauffer, Tico Balentien, Ataniro for di Aruba, Tsean for di Hulanda i chènsnan ta grandi ku segun dianan ta bai lo añadí mas artista.

Wikènt di Gimmick

Preis pa e festival aki, ta fl. 65,- general i fl. 175,- pa VIP. Sinembargo, pa e wikènt aki lo bo p r haña bo karchi di entrada na preis redusí. T’asina ku tantu djabièrnè komo djasabra lo tin gimmick riba karchi; djabièrnè esaki lo tuma lugá di 6or pa 8or di anochi na Fusions, unda a la bes lo tin un Meet & Greet ku e diferente artistanan ku lo presentá e dia aki, i tambe djasabra na Licores Maduro di 10or di mainta pa 1or di mèrdia. Durante e dos dianan aki karchinan lo ta respektivamente fl. 50,- i fl. 150,-.

Entrada

For di djaluna 8 di aprel, karchi di entrada lo ta optenibel na su preis nòrmal na Beep Beep, 24 Uur uit de Muur, Mensing’s, van den Tweel Supermarket Zeelandia i Janthiel i tambe online riba website di Tickets Caribbean. Tambe tin oportunidat pa kumpra karchi ku bo ‘miles’ na ofisina di Fun Miles.

Karchi di VIP lo ta optenibel solamente via 540-0111.

Informashon

Pa kualke informashon di Jazz Meets Cultures 2019, por chèk su página di Facebook i tambe Instagram, bou di e nòmber JazzMeetsCultures, via email na info@jazzmeetscultures.com òf tambe via di e number di telefon 540-0111.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: