Minister di Finansa, Asuntonan Economico y Cultura: Nos ta keda den contacto cu instancianan internacional pa Aruba por recupera confiansa y credibilidad financiero

Minister di Finansa, Asuntonan Economico y Cultura:

Nos ta keda den contacto cu instancianan internacional pa Aruba por recupera confiansa y credibilidad financiero

 

ORANJESTAD – Siman pasa Minister Xiomara Ruiz-Maduro tabata tin un siman basta ocupa cu bishita di trabao di instancianan internacional. E contacto aki ta necesario pa asina Aruba por recupera confiansa y credibilidad financiero.

 

A habri siman cu bishita di Embahador Europeo na Guyana encarga cu, entre otro, Aruba sr. Jerney Videtic y Hefe di Cooperacion sr. Karel Lizerol cu ta na Aruba pa por finalisa e acuerdo financiero pa haci e SISSTEM faculty na Aruba un realidad. Aruba ta haya 13 miyon EURO for di e 11 Fondo di Desaroyo Europeo pa realisa e proyecto aki.

Hunto cu Profesor Pieters di Universidad di Leuven (KULeuven) y sra. Rosemary Lall, representante di Programa di Desaroyo di Nancionnan Uni (UNDP) a firma e acuerdo financiero pa haci e facultad di SISSTEM posibel. KULeuven lo percura pa e curiculo y UNDP lo renoba y ekipa e edificio di Maria Convent pa hospeda e facultad di SISSTEM.

 

Minister Ruiz-Maduro hunto cu  Minister President a reuni cu sra. Marina Walter kende ta e Coordinador Residente di Nacionnan Uni encarga cu entre otro Aruba. Sra. Walter a entrega su credencialnan na Minister President y a tuma oportunidad pa splica e manera nobo cu Nacionnan Uni ta bay traha hunto cu Paisnan manera Aruba di mediano entrada. Durante e reunion  a toca e esfuersonan di Aruba pa implementa e metanan di sostenibilidad di Nacionnan Uni y a indica unda asina Aruba ta spera di por conta cu sosten technico of financiero di Nacionnan Uni pa ehecuta proyectonan na bienestar di nos Pais.

 

Den Conseho di Minister tambe a despedi den Conseho di Minister di sr. James Grimes di US Customs Border Patrol (CBP) kende a labora pa 6 aña y mey na Aruba y awor lo bay bek pa sigui cu su labornan na Baltimore, USA. Di parti Gobierno y comunidad arubano a gradici sr. Grimes pa su trabao y tambe e aprecio pa nos Pais.

 

E mandatario encarga cu e cartera di Finansa, Asuntonan Economico y Cultura a sera siman cu un reunion cu ehecutivonan di IMF na final di nan bishita na Aruba na ocasion di nan Article IV mission. E reunion tabata uno bon na unda a repasa nan resultado preliminar di e evaluacion financiero y economico di nos Pais. E siman aki e resultado preliminar a bira conoci caminda Aruba a ricibi un evaluacion positivo di nos situacion economico financiero for di IMF. E evaluacion positivo di IMF, ta hopi importante pa nos pais, ya cu e ta mustra cu Aruba ta riba e bon caminda pa nos recupera e credibilidad financiero cu nos mester como pais. Minister ta gradici tur persona y instancia cu a contribui na haci e mision aki uno exitoso pa Aruba.

 

Pa recapitula por mira cu e siman tras di lomba tabata uno hopi positivo cu bishitanan di trabao di instancianan internacional cu ta demostra nan interes y confiansa den Aruba.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: