Instalashon Miss Kòrsou 2026
Instalashon Miss Kòrsou 2026
WILLEMSTAD – Djaweps 14 di Mei 2026 na Papagayo Beach Club, a tuma lugá e rueda di prensa i presentashon di kantidata nan pa Miss Universe Curaçao 2026.
Curacao International Crowned Queens, bou di liderato di Gionel Virginie, ofisialmente a presentá e seis (6) kantidatanan ku lo ta den kontienda pa e titulo di Miss Korsou 2026 durante un rueda di prensa realisá na Papagayo Beach Club.
E aña aki lo marka un momento historiko pa e organisashon, mirando ku Curacao International Crowned Queens a keda enkargá pa organisá edishon number 60 di Miss Universe Curaçao.
Durante e rueda di prensa, pueblo di Korsou por a konosé e damanan ku lo kompetí pa e korona. Kada unu representando nan bario.
- Bianty Rojer Gomperts – Amerikanenkamp
- Liandra Lindeborg – Jongbloed
- Sharepha Pauletta – Komunidat Kòrsou na Hulanda
- Gillian Dacosta Gomez – Saliña
- Shurmeen Martis – Santa Maria
- Tyiandra Brunken – Tera Cora
For di inisio, e organisashon a indiká ku e ganadó di Miss Korsou 2026 lo risibí un pakete di premio ku ta balorá na 50.000 florin. Durante e rueda di prensa di awe, tambe a wòrdu revelá ku parti di e premio lo ta un auto, pa kortesia di HCR.
Segun e organisashon, e periodo rumbo pa final lo ta relativamente kòrtiku, pero intensivo i yen di preparashon profeshonal e.o:
- Charla/tayernan
- Pasarella
- Baile i kondishon fisiko
- Aktividatnan sosial
Tur esaki ku e fin pa ofresé Korsou un sertamen i show di kalidat.
“Miss Korsou ta den un etapa i era kompletamente nobo. Nos meta ta involukrá pueblo di Korsou kompletu den e proseso rumbo pa koronashon di nos proksimo reina,” segun Curacao International Crowned Queens.
E gran final di Miss Korsou 2026 lo tuma lugá riba 26 di Jüli 2026, mirando ku organisashon di Miss Universe a eksigí ku tur pais mester selektá nan representante promé ku luna di Ougùstùs.
Ademas, pueblo por spera un programa televisivo speshal unda lo por sera konosí mas di serka ku e kantidatanan, sigui nan trayekto i wak diferente “challenge” durante e kompetensia.
Pa tur aktualisashon i informashon ofisial, sigui Curacao International Crowned Queens riba Facebook i @missuniversecw riba Instagram.
Tin un mihó bista riba kantidata nan i organisashon via pagina web; crownedqueenscw.com
