185 ahedresista hubenil den akshon

185 ahedresista hubenil den akshon

 

Un total di 185 hóben ahedresista for di 11 isla den Karibe ta bai kompetí den e di 8 edishon di Carifta Junior Chess Championship. Esaki ta un rèkòrt den historia dje kampionato hubenil di ahedres aki ku ta tuma lugá di 18 pa 23 di aprel próksimo na Kòrsou.

Direktiva di Federashon Ahedres Kòrsou (FEDAKO) ayera, djaweps 4 di aprel 2019, a tene un enkuentro ku prensa pa suministrá último informashon tokante e kampionato hubenil di ahedres di Karibe. Esaki a tuma lugá den sala Blenchi di Curaçao Hilton Resort na Piscadera.

Presidente di direktiva Michell Fayad i tesorero Marlon Picus a representá FEDAKO. Tambe a hiba palabra promotor di evento alabes miembro dje komishon organisadó Jimmy Izijk. Mas aleu Adayfa de Lannoy ku ta ofisial di merkadeo di MCB ku ta patrosinadó mayó dje Carifta Junior Chess Championship tambe tabata presente.

E informashon mas alentador ta ku un kantidat rèkòrt di isla den Karibe ta kompetí den e di 8 edishon di Carifta Junior Chess Championship na Kòrsou. Esakinan ta Antigua & Barbuda, Aruba, Bahamas, Barbados, Bermuda, Guyana, Jamaica, Surnam, Trinidad & Tobago, US Virgin Islands i di mes Kòrsou

Un total di kasi 185 hóben te ku 20 aña ta bai kompetí den diferente kategoria di edat kontra di otro den e siman di 18 pa 23 di aprel. Ta trata di 130 ahedresista dje 10 islanan bishitante i 55 hungadó di Kòrsou.

Mas aleu ta spera mas òf menos 250 persona ku ta bishitá Kòrsou spesialmente pa e evento. Esakinan ta fuera dje dirigente i ofisialnan dje delegashonnan, tambe famianan ku ta kompaña e ahedresistanan. Esaki pues ta mustra ku deporte tambe ta un instrumento pa desaroyo positivo di turismo pa Kòrsou.

=========================================

carifta mesa FEDAKO

 

Riba e foto di robes pa drechi:

Adayfa de Lannoy, ofisial di merkadeo di MCB, Michell Fayad, presidente di FEDAKO, Marlon Picus, tesorero di FEDAKO i promotor-organisado Jimmy Izijk.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: