Na benefisio di piskadónan i pa fasilitá CITRO den kaso di emergensia, Minister Camelia- Römer ta inisiá proyekto di draga Playa Canoa

April 5, 2019 REDAKSHON

Na benefisio di piskadónan i pa

fasilitá CITRO den kaso di emergensia,

Minister Camelia- Römer ta inisiá proyekto di draga Playa Canoa

Willemstad – Resientemente Minister di Salú, Medio Ambiente i Naturalesa mr. Suzanne Camelia- Römer a inisiá importante proyekto na Playa Canoa. Ta trata aki di un proyekto pa draga (bagger) e haf di piskadó pa asina garantisá ku piskadónan por hasi uzo máksimo di e playa i pa fasilitá CITRO momentu di eventual reskate na kosta nòrt di Kòrsou. Draga e haf ta altamente nesesario pa motibu ku laman den transkurso di tempu a depositá gran kantidat di santu den e haf i hasi esaki muchu plat pa piskadónan i botonan di CITRO.

Koperativa di Piskadónan di Playa Canoa ta sumamente satisfecho ku e proyekto aki pasobra awor nan por sera mas piská den e haf sin ku esakinan ta muri. Den un laman plat e awa ta keinta muchu mas lihé kual ta redusí e konsentrashon di oksígeno konsiderablemente i pone ku piskánan ta muri. Esaki ta un situashon hopi lamentabel ku alabes ta kondusí na pèrdida innesesario di kuminda salú pa pueblo. Pa CITRO tambe ta di sumo importansha ku e haf ta sufisiente hundu pa baha nan botonan ya ku aki ta e úniko sitio na nòrt ku por baha boto i yega rápido den kaso di reskate.

Minister Camelia- Römer ku a bishitá e haf na Playa Canoa pa tuma nota di e trabounan a splika ku situashon finansiero di gobièrnu ta di atenshon, pero ku traha tiki tiki den fase nos por ehekutá proyektonan importante manera esaki. Minister a mustra tambe ku mester studia e posibilidat pa Ministerio GMN haña un pèrmit permanente pa asina redusí e tempu di haña pèrmit pa inisiá proyektonan similar. Durante trabounan di draga e haf laman lo mustra sushi pero esaki ta temporal. Algun dia despues ku e proyekto ta kla e partíkulanan di santu ta sak bai fòndu i laman ta bira limpi bèk manera ántes.

Riba potrèt momentu ku Minister Camelia- Römer a bai tuma nota di e proyekto. Drpd; kolaboradó di minister señor Girigorie, señor Bouwland di GMN, lider di proyekto señor Burgos, presidente di Koperativa Piskadónan di Playa Canoa señora Angela, Minister Camelia- Römer i señor Van Aanhold di kontratista Aliansa.