Willemstad- Gobièrnu di Kòrsou ta rekonosé e diferente abilidatnan di nos komunidat. Un di e áreanan ta regardá esun gastronómiko/kulinario. Tumando nota ku Broertje Marshall riba nivel internashonal a pone Kòrsou pa años den e lus positivo, Gobièrnu a introdusí e Premio Charlwin ‘Broertje’ Marshall ku e aña aki pa promé biaha ta keda otorgá i ta dediká na nos hobennan. E kategorianan ta: Junior Chef i Senior Chef.

Resientemente durante inisio di e kompetensia entre e hobennan ku a inskribí, Minister Marilyn Alcalá-Wallé a splika e oudensia e motibu di e premio, e premio mes mará na e kompetensia ( un suma i alabes un obra trahá pa Giovanni Abath: Un Konfó den un Bubbel”), a deseá tur hóben den e kompetensia éksito, a gradisí e tim ku ta karga e ehekushon i alabes a otorgá sr. Marshall e dekreto ofisial pa lokual ta institushon di e premio.