International Food & Fiesta Festival

April 26, 2019 REDAKSHON

Armando Fiesta Show ta enkargá ku organisashon di International Food & Fiesta Festival ku ta tuma lugá dia 27 i 28 di aprel benidero na SOV Asiento, Rust & Burgh. E aña aki e evento ta keda dediká na Faried Haseth, den felis memoria, komo e persona ku a kuminsá ku e evento aki algun aña pasá. E konsepto di e International Food & Fiesta Festival ta mantené e forma akustumbrá ku varios aria di kuminda, musika, benta di artikulonan i aria kaminda muchanan por entretené nan mes. Na tur lo tin 10 stènt di kuminda repartí riba diferente pais: Kòrsou, Venezuela, Sto. Domingo, Jamaica, Portugal, Haiti, Surnam, Libanon. E aspekto di Fiesta a keda agregá na e Festival i ta bai tin musika di e house band Ike Jesurun, Agrupashon musikal Hoben na Timon, ERA Outentiko, Minguelito i su bomba i diferente DJ. Alabes lo tin un show di moda. Tur mucha por drenta e area pa mucha ku lo tin bouncer i mas aktividat spesial pa nan. Entrada General ta Naf. 5,-.

Armando Fiesta Show ta invitá pueblo di Kòrsou pa pasa 2 dia yená ku kuminda i aktividat durante di e International Food & Fiesta Festival.