Komunikado di Prensa relashoná ku e hecho ku koriente a kai afó na SEHOS       Sehos su Plan di Kalamidat a drenta na vigor

Komunikado di Prensa relashoná ku e hecho ku koriente a kai afó na SEHOS      
Sehos su Plan di Kalamidat a drenta na vigor  


Willemstad – Awe marduga koriente a kai afó den parti di Otrobanda i Rif. Esa’ki tabatin komo konsekuensia ku koriente a kai afó den hospital SEHOS lokual no ta usual, ya kua Aqualectra ta duna semper preferensia na SEHOS komo ku e ta un hospital. E Plan di Kalamidat di SEHOS a keda aktivá rápidamente pa e Tim di Kalamidat i e tur e departamentunan krusial -Kamara di Operashon, Intensive Care Unit, Unidat Neonatal (di babynan den couveuse) i EHBO a funshoná por medio di e sistema di backup de SEHOS.   

Ròl di Sehos

Na promé lugá ta SEHOS ta responsabel pa e hospital i ehekushon di su Plan di Kalamidat.

Minister di Salú for di trempan a tuma kontakto ku direktor di Hospital, sr. Casperson i tambe direktor finansiero sr. Thodé, ku ámbos a splika minister detayadamente e pasonan ku a keda tumá dor di SEHOS. Segun e informashon risisbí,  e backup di SEHOS dirigí riba e systemanan i aparatonan krítiko, ku e meta pa keda garantisá e seguridat di e kuido di e pashènt, a funshoná debidamente. SEHOS ta mantené i tèstnan regularmente. Esaki no ta solamente e generatornan, pero tambe e sistema di UPS i bateria etc. Tur e 7 miembronan di Tim di Kalamidat  a asumí nan responsabilidat i nan a aktivá 13 kolega mas di kuido i technische dienst pa yuda nan. Tambe segun SEHOS, e kontaktonan interno entre di e tim di kalamidat i tur e departamentonan a tuma lugá, meskos vigilansia mas aktivo di pashèntnan. Tur e personal konserní a aktuá segun e relato debidamente. Kemen, segun SEHOS e hendenan, ekiponan i proseduranan a kana konformé e Plan di Kalamidat.

Ròl di Ministreio di GMN i Inspekshon di Salú

Den e kuadro di Miniserio di Salú, Inspekshon di Salú ta e instituto responsabel pa kòntrol independiente di kalidat i funshonamentu di tur hospital, esta SEHOS, Advent i Capriles, i ta hasi su investigashonnan independiente. Ke men lòs di e splikashon di SEHOS manera formulá aki riba, Inspekshon di Salú ta kontrolá si bèrdat e sistema di kalamidat a funshoná spesífikamente den e kaso aki.  Minister a enkargá Inspekshon ku e investigashon, i mester bisa ku Inspektor mes tambe a tuma initiativa pa hasi investigashon di e suseso.

Ròl di Aqualectra

Sra. Minister a tuma kontakto ku direktor di Aqualectra, sr. Jonis, ku tambe a duna un splikashon amplio ku un kabel di transmishon di 30KV entre Aqualectra Mundu Nobo i substation Parasasa a kai afó.   

Minister di Salú a pidi SEHOS, Inspekshon i Aqualectra pa duna un splikashon amplio na pueblo di kada ken su responsalbilidat, lokual a sosodé durante dia.

Por último Minister ta lamentá e hecho ku pashènt, famianan i pueblo en general a pasa momentunan di tenshon.

Ministerio di Salú gobiernu

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: