Global Entrepreneurship Week Curaçao ta gana award hopi kodisiá entre mas di shen pais na konferensia mundial di GEN na Bahrain

Global Entrepreneurship Week Curaçao ta gana premio hopi kodisiá na nivel mundial durante konferensia na Bahrain
WILLEMSTAD – Durante di e kongreso anual di Global Entrepreneurship Network (GEN), ku a tuma lugá e aña aki na Bahrain, Global Entrepreneurship Week Curaçao a gana e premio ‘Champion Catalyzer Award – Most GEW Partners Per Capita’. Esaki ta un premio hopi kotisá si tuma na kuenta ku GEN ta konta ku 170 pais komo miembro.
Global Entrepreneurship Network (GEN) ta stimulá kreashon i desaroyo di empresanan rònt mundu. Un di nan ta ku ta promové na paisnan miembro di GEN pa organisashonnan stimulá hasimentu di negoshi durante di un siman den luna di Novèmber. Esaki no solamente den e pais mes, pero alabes via di kolaborashon riba nivel mundial den e ret di GEN. Di e forma aki ta krea un eko-systema ku lo mester desaroyá hasimentu di negoshi na nivel lokal i global.
Na 2014 GEN ta otorgá lisensia na Fundashon Negoshi Pikiña pa promové i ouspisiá Global Entrepreneurship Week na islanan di Karibe Hulandes. Fundashon Negoshi Pikiña pa mas ku 17 aña, huntu ku instansianan rekonosé den nos mundu di edukashon, a perkurá pa stimulá sentido empresarial serka hóbennan komo parti di nan kuríkulo di estudio na skol. Global Entrepreneurship Week (GEW) ta un inisiativa ideal a e hóbennan aki por tin un eko-systema den kua nan por sigui desaroyá eventual inkietut i ideanan empresarial. Un plataforma pa via kua nan por sigui prepará nan mes pa medio di programanan di informashon, networking, interkambio ku otro start-ups. GEW no ta solamente pa ‘start-ups’, pero tambe pa empresarionan ku ya tin un negoshi esatblesé pan a por ‘scale-up’.
Ya durante di e tres promé añanan Global Entrepreneurship Week Curaçao a risibí menshon spesial na e konferensia mundial di GEN pa esfuersonan desplegá. E trabounan ku e ‘board’ organisadó na Kòrsou a realisá na 2018, ku sosten di partnernan, tabatin komo resultado ku GEW Curaçao a ser premiá na e konferensia mundial ku a tuma lugá resien na Bahrain, Medio-Oriente ku e award ‘Champion Catalyzer – Most GEW Partners Per Capita’. Esaki ta un di premionan mas kodisiá ku ta otorgá tur aña na e konferensia mundial di GEN. Sigur entre paisnan ku no ta di un territorio grandi i ku tin limitashon di abitante manera Kòrsou.
Sra. Elgenia Pieternella, presidente di GEW Curaçao, tabata presente na Bahrain, entre mas di mil invitado, i a risibí e rekonosementu for di man di Jeff Hoffman, miembro di board di GEN. Sr. Hoffman no ta un deskonosí riba nos islanan ya ku e tabata un invitado spesial i oradó na GEW Curaçao i GEW Bonaire na 2016. E premio a pone nos den spòtlait i varios ta e personanan ku a aserka sra. Pieternella pa sa mas di nos islanan. Un di nan tabata e minster di Industria, Komèrsio i Turismo di Bahrain, HE Zayed bin Rashid Alzayani.
GEW Bonaire tambe tabatin representashon presente na e kongreso na Bahrain i a risibí nominashon den dos kategoria. Ya na 2016 GEW Curaçao a eksportá pa Boneiru. Nos hermana isla tambe den algun aña a hala atenshon di GEN. E aña aki ku 2 nominashon.
E board organisadó di Global Entrepreneurship Week Curaçao, ta sumamente orguyoso di e rekonosementu mundial aki i ta yama un danki na tur partner ku a demostrá nan konfiansa pa por a hasi GEW Curaçao 2018 posibel. E presidente di GEW Curaçao, Elgenia Pieternella, “E logro aki ta mustra un biaha mas ku trahando huntu nos komunidatnan por logra kosnan grandi tantu lokal, komo riba nivel mundial,” sra. Pieternella a ekspresá. Nos a traha ku un tim dediká, ku sosten di basta persona, organisashon i instansianan partner na benefisio di nos islanan.”
E aña aki Global Entrepreneurship Week lo ta di 18 pa 24 di Novèmber. “E ‘board’ organisadó ta spera di por konta ku sosten di partnernan di último añanan i ku por yama bon biní na mas partner den 2019. Alabes nos tin e deseo ferviente pa mas i mas organisashon tene un òf mas aktividat durante di Global Entrepreneurship Week den Novèmber bou di e paraplü di Global Entrepreneurship Week. Hasiendo esaki nos lo uni forsa pa stimulá nos ekonomia i sigui tene nos islanan den spòtlait mundial,” e presidente di GEW Curaçao a finalisá bisando.