Sra. Neysa Schoop-Isenia ta hala tras 

Sra. Neysa Schoop-Isenia ta hala tras

Sra. Neysa Schoop-Isenia ta hala tras komo kantidato pa Minister di Desaroyo Ekonomiko, pero lo e tuma akshon kontra di Banko Sentral.

Formador, Minister President sr. Eugene Rhuggenaath i frakshon di partido MAN a keda notifiká di e desishon di sra. Schoop-Isenia pa pone su disponibilidat pa e funshon di Minister di Desaroyo Ekonomiko bèk na disponibilidat di frakshon di e partido.

Sra. Neysa Schoop-Isenia ta keda disponibel pa sirbi su pais den kualke otro funshon, manera semper el a hasi.

E hecho ku e ta hala tras i pone e funshon disponibel bèk, ta pa motibu di varios faktornan ku legalmente no tin nada di haber ku hinter e proseso di screening i e politika tradishonal. Na momentu ku sra. Schoop-Isenia a keda aserká pa partido MAN pa asumí e funshon komo Minister di Desaroyo Ekonomiko, el a aseptá e petishon komo ku semper e tabata tin e deseo di sirbi nos pais. Sinembargo el a nota for di un prinsipio ku politika i forsanan tradishonal no tabata habrí pa aseptá su kandidatura i a sa di oponé kontra di esaki tambe. Sra. Schoop-Isenia a laga e proseso di screening kana su kaminda. Di un banda pa laga e personanan aki kustumbrá na e hecho ku por kibra ku tradishon i di otro banda pa nan por bai ripará ku kambio ta e uniko solushon pa por kambia e rumbo den kual nos pais ta bayendo. Ku kara na laira sra. Schoop-Isenia ta konvensí ku e ta kapas pa sirbi nos pais konforme leynan ku ta vigente. Ta di lamentá ku politika i forsanan tradishonal no ta habrí pa kambionan nesesario i a stroba e nombramentu di tur forma i sin base. Durante di hinter e proseso di nombramentu, e integridat ku sra. Schoop-Isenia a traha duru riba dje durante di su bida pa medio di enrikesé su konosementu, su balor propio i integridat profeshonal, a keda kuestioná di un manera inhustu. E memo ku a keda mandá pa Minister Gijsbertha dor di president ad-interim di Banko Sentral (CBCS) sra. Leila Matroos-Lasten a trese hopi interogatorio pa loke ta trata integridat di sra. Schoop-Isenia.

Meskos ku kualke otro suidadano sra. Schoop-Isenia tambe tin derechi di kana e kaminda nesesario pa klara su nòmber ku a keda tachá. Un posibel paso ta di hasi un denunsia kontra di Banko Sentral na Ministerio Publiko i sigur un keho kontra di sra. Matroos-Lasten na Koninklijke Nederlandse Beroepsorganisatie van Accountants.

E pasonan aki ta nesesario pa sra. Schoop-Isenia mes pero tambe pa tur yu di tera ku den futuro lo tuma e desishon di ke sirbi su pais di un manera digno.