Prome Minister Evelyn Wever-Croes: Pa atende reunionnan importante tocante Venezuela y refineria: PROME MINISTER LO TA NA WASHINGTON OTRO SIMAN PA UN ‘JOINT MISSION’
Prome Minister Evelyn Wever-Croes:
Pa atende reunionnan importante tocante Venezuela y refineria:
PROME MINISTER LO TA NA WASHINGTON OTRO SIMAN PA UN ‘JOINT MISSION’
Embahada di Reino na Washington ta organisa un ‘joint mission’ cu lo tuma luga otro siman na Washington. Prome Minister di Corsou Eugene Rhuggenaath y Prome Minister di Aruba Evelyn Wever-Croes lo compaña e Embahador di Reino na algun reunion dialuna y diamars benidero. Riba agenda tin varios reunion cu tin como punto central tanto e refineria como tambe e impacto cu e crisis migratorio di Venezuela tin riba Aruba. Lo reuni cu State Department y OFAC cu ta esnan cu ta atende cu e sanccionnan.
Prome Minister Evelyn Wever-Croes a duna di conoce cu un biaha mas lo informa con importante e refinerianan ta pa economianan di nos paisnan y ta considera esaki un ultimo intento cu lo haci pa logra scapa e refineria teniendo cuenta cu cos ta mustrando mas dificil.
Na Capitol Hill tambe lo tuma luga reunionan cu congresistanan unda cu lo enfatisa tambe e importancia di e impacto di e refineria y e impacto di e crisis migratorio tin riba economia di nos paisnan. Prome Minister a enfatisa cu ta importante pa nan realisa cu cada decision cu nan tuma aya tin su impacto riba e islanan chikito manera Aruba pero ta sumamente significante.
Tambe lo tin algun encuentronan entre otro cu IMF y WorldBank na unda tambe lo trata e tema di Venuela y su impacto pa mira con Aruba por bin na remarke pa mas fondo pa yuda nos cu e problematica aki. Un otro punto di agenda importante ta algun orientacion economico pa atrae inversionistanan pa Aruba. Recientemente, Gobierno a presenta su vision economico y e pilarnan economico cu lo promove y awo Gobierno ta en busca di inversionistanan pa inverti den nan.
Prome Minister lo ta na Washington dialuna y diamars pa atende e reunionnan importante aki y lo ta bek na Aruba diaranson cu e speransa di trece bon noticia bek pa nos pais.
