VEREDIKTO DEN HUISIO SUMARIO ENTREGOBIERNU DI KORSOU I DAMANAN INDOKUMENTA”
VEREDIKTO DEN HUISIO SUMARIO ENTRE
GOBIERNU DI KORSOU I DAMANAN INDOKUMENTA”
Korte di Promé Instansia ta rechasá petishon di 7 dama indokumentá pa obtene nan libertat.
Dia 10 di Mei último, Korte den Promé Instansia a dikta sentensia den kaso di 7 dama, ku ta forma
parti di e grupo di 33 persona indokumentá ku a entamá un Huisio Sumario kontra Gobièrnu di
Kòrsou.
Na promé lugá e personanan aki a hasi un petishon pa suspendé (“schors”) ehekushon di nan
deportashon ku mester a tuma lugá pa mas tardá 11 di mei 2019.
Gobièrnu di Kòrsou respetando e “ Decision of Interim measure” di dia 23 di aprel ku Korte Oropeo a
dikta a base di artíkulo 39 di Tratado Internashonal di Derechonan Humano ( EVRM) lo no a ehekutá
e deportashon aki. Mas aun, maneho aktual di Gobièrnu ta stipulá ku na momentu ku un persona hasi
un petishon pa protekshon a base di artíkulo 3 di e Tratado konserní, e persona aki lo no keda
deportá, durante ku e proseso ta andando i no a yega na un desishon ainda. Pa e motibu aki Korte a
konsiderá ku e petishon pa wanta e deportashon tabata irelevante.
Mas aleu e damanan a pidi suspenshon di nan detenshon “bewaring”, tanten nan ta warda desishon
riba nan petishon di protekshon. Por último e damanan aki a ekspresá kehonan kontra e
sirkunstansianan na SDKK kaminda nan ta temporalmente ubiká kual nan ta konsiderá komo
inhumano i denigrante. Komo tal nan ta alega ku nan estadia den SDKK riba su mes ta un violashon
di nan derechi humano i komo tal nan tin derechi riba nan libertat.
Hues, den kuadro di evaluashon di e petishonnan a hasi un bishita na SDKK kaminda e personanan
aki a keda temporalmente ubiká i a konstatá lo siguiente:
– e damanan no ta keda huntu ku detenidonan penal;
– nan ta risibiendo un bon trato;
– e lokashon kaminda nan ta keda, ta limpi;
– nan ta risibí kuminda (3 kuminda pa dia, inkluyendo kuminda kayente merdia) na ora;
– nan tin akseso liber (gratis) na kuido médiko;
– nan tin akseso na televishon;
– nan ta “lucht” dos ora pa dia i por kana rònt liber den e lugá;
– por último e damanan tin oportunidat pa rekreo tambe.
Komo tal Hues ta konklui ku e sirkunstansianan inhumano ku e damanan a presenta pues, no ta
kuadra ku realidat i nan detenshon no ta kontra lei.
Hues por último ta remarka ku e ta komprondé ku e damanan aki ta eksperensiá nan estadia den un
prisòn komo algu no agradabel, sinembargo for di punto di bista di e Tratado Oropeo di Derechonan
Humano ( EVRM) nan no ta den un situashon inhumano i denigrante manera nan ta alega
